المصريون : سبع آلاف سنة نخع
يا عم جِخ وانخع براحتك زي ما انت عايز .. ما انت ضامن إن ما حدش ح يكدّبك .. مين اللي قال لك إن الدلعدي "حتشبسوت" كانت بتستمتع وهيَّ بترقُص للإله "آمون"؟ .. يعني عرفت منين إحساسها وشعورها في الوقت ده؟! .. ولّا دي إفتكاسة جديدة من إفتكاساتك؟ .. زي إفتكاستك لمّا قُلت إن الفراعنة كلّهم كانوا أهلاويّة وإن الأهلي هو نادي القرن العشرين حسبما جاء في البرديّات!!!
وعلى فكرة: أنا كمان دارس آثار واعرف الكُفت في علم المصريات لأني قريت ما لا يقل عن كتابين عن الفراعنة .. وكان كل كتاب لا يقل عن خمستاشر صفحة بحالهم .. وأحب اعرّفكم إن الملك خاف-رع كان بيحب ياكل كوا-رع من المسمط اللي في جاردن سيتي الأول وإن الفرعون بتاح-آمون كان بيحب يشرب شوربة الفول النابت بالكا-امون وبيعصر عليها لا-امون وإن توت عنخ آمون كان بيموت في جيلي التوت.