أمثال صعيدية عبقرية مهجورة | خلاصة الحكمة والخبرة

ديسمبر 2015 :

 

 

كابتن "عادل هيكل" حارس مرمى الأهلي في الستينيات اعترف بإن الأهلي فاز بكاس مصر 1966 بعد ما دفع رشوة لبعض لاعبي الترسانة عن طريق كبير مشجعيه آنذاك "عبده البقّال" .. لغاية كده عادي .. أكيد فيه رشاوى ف الكورة (خصوصاً ف الأهلي والزمالك اللي معاهم فلوس) زي ما فيه رشاوى وفساد في أي حِتّة ف "مصر" وأبطالها الفاسدون أهلاويّة أو زملكاويّة أو حتى من غير مِلّة .. إنما اللي مش عادي إن كابتن "أحمد شوبير" (اللي كان عنده أيّامها ست سنين) يطلع يردح لـ"هيكل" ويتهمه بإنه كبر وخرّف .. والدليل القاطع والبرهان الساطع عند "شوبير" إن عمر ما النادي الأهلي ولا أي حد اتربى ف النادي الأهلي يقدر يخرج عن المبادئ القويمة والأخلاق الكريمة والفضائل المستقيمة والسجايا العظيمة بتاعة النادي .. طب كانت فين المبادئ والأخلاق والفضائل والسجايا دي لمّا كنت سيادتك (رباية الأهلي) بتدفع رشاوى وتزوّر ف الانتخابات (مش ح اقول لك على حاجات تانية بطّالة كتير عملتها) .. ولّا الحاجات دي جبتها من برّه النادي؟ .. قال على رأي سِتّي "سِكْسِكة" الأهلاويّة: "أبوك البصل وأمك التوم .. منين تجيك الريحة الحلوة يا مشئوم" .. قطيعة تقطعك.