النعامة والثعلب
إحنا ح نضحك على بعض يا باشا .. ما كلنا عارفين إن 90% من المدرسين بيدوا دروس خصوصية وإلا ما كانوش عرفوا يعيشوا .. يعني الإقصاء ده ح يتم لأكتر من نص مليون مدرس؟ ولا همَّ بضع مئات فقط غير مرضي عنهم وما لهمش واسطة؟ .. ويا ترى مين اللي قام بإحصاء المدرسين دول: مفتشين بيمشوا ورا كل مدرس بعد انتهاء اليوم الدراسي؟ ولّا مخبرين تبع الوزارة؟ ولّا عرفتوا المدرسين دول من المعاهد التعليمية والسناتر؟ طب والمدرسين اللي بيدوا دروس خصوصية في البيوت عرفتوهم منين؟ ولا الوزارة استعانت بالتقارير السرية للأمن الوطني؟ .. يبقى أكيد موضوع الدروس الخصوصية ده مش هوَّ السبب لإبعاد أو عدم الاعتماد على مدرسين دون غيرهم .. تكونش الأسباب سياسية زي مثلاً تطهير الوزارة من الإخوان؟ .. ولا يمكن علشان تبقى الحِجّة جاهزة لأي حد تستبعدوه من منظومة التعليم؟ .. ده إذا كان فيه تعليم أصلاً .. جتنا ستين خيبة في خيبتنا الخايبة.