أمثال صعيدية عبقرية مهجورة | خلاصة الحكمة والخبرة

صورة واحد مطرب مهرجانات (3)

 

 

السبت:

قُمتُ – في منزلي – بمقابلة المُخرج اللامع "كابونجا كاسونجا" الذي يقوم بإخراج كل كليبّاتي التي تتصدّر مواقع الأغاني ورنّات الموبايل وقنوات التليفزيون ومحطّات الراديو ولم يبقَ لها سوى أن تظهر على أرفُف الثلّاجة وأفران الميكروويف وشُعلات البوتاجاز.

وأطلعني "كابونجا" على الستافّة أو طاقم العمل الذي يشارك في إعداد وتصوير وديكورات وملابس ومونتاج وإخراج وإبداع الكليب الجديد وهم (بدون ترتيب): كوكاينا – زوكش – عنبة – برقوقة – طيخا – كمّونة – كوولبكس – أبو الأنوار – نوجارا – زوكا – قشطة – زيروك – شيتوس – أوشا – موشا – ميشو – ليمبي – كامباس – كابّو – ريشة – مادا – مانشستر – كعبورة – مارسيللو – نَكَش – شاكي – ديمو – ديبو – ميزي – فيلو – أبو ليلة – زيزو المايسترو – شريف غزالة – عبد الله باندا – سامو الإرهابي – حتحوت – كاتي – مانو – بيلوش لوش – شيكو مينوش – إسلام تايجر – عائلة الأبيض – علي سندس – بليه – تيجانا – توتي الجنتل – شيكو – عائلات فلِتّو – وليد ويشا – فتحي البوب – نوئّه – شريف أوسا – تيمو – محمود نانسي – بالو – فلونكة – ماجو – الدجوي – حمّودي – النون – عفركوش – فوريو – أوكا – أورتيجا – قلاظة – شيكو – بوظا – كباكا – بسكوتة – حُمُّص – محمد بابا – محمود سمنة – أيمن لمونة – أويري – سمارة – تيتو – كلوشة – سيكا – عمر شقاوة – كوكي – روسيا – تليمة، وأخيراً المونتير ذو الاسم الغريب (ويبدو أنه أجنبي ضلَّ طريقه إلى "مصر"): أحمد صلاح.

وعندما استفسرت منه عن لوكيشن الكليب قال لي:

-       فاكِر أماكن تصوير الفيديو كليب اللي فات؟ .. كانت ف أرض عيلة الحاج "سيّد القالِح" .. اللي كان فيها مصانع ووِرش مهجورة ومستودعات خُردة ومخازن بواقي التصنيع البايظة .. وكانت أغلب الجُدران والحيطان مهدومة والأبواب مكسَّرة والشبابيك مدغدغة والأرضيّات وِسخة وكلّها حُـفَر ياما وبِرك ميّه وطين كتير .. فاكِر؟

-       آه طبعاً فاكر .. حتى كُنّا يوميها لابسين إفارولات قذرة ومشحّمة ع اللحم .. والبنات اللي بيرقصوا ورانا كانوا لابسين فانلّات حمّالات متوسّخة ومتقطّعة وهوت شورتات مرقّعة ومحزَّقة.

-       تمام .. المرّة دي بقى لقيت لوكيشن جديد إنما إيه .. جناااااان .. ح نصوَّر ف خرابة ف منطقة "اسطبل عنتر" اللي عند عِزبة "الهجّانة" .. عارفها؟

-       آه طبعاً .. أنا عارف كل زرايب واسطبلات البلد .. آآآآآ .. أصل انا .. آآآآآ .. آه كُنت باتاجر ف الحاجات دي زمان.  

-       أهو احنا بقى جِبنا عربيّة زبالة قديمة ومصديّة علشان أفراد الفِرقة يقفوا عليها وهمَّ بيغنّوا ف الخرابة .. ح نصوَّر مرّة بالنهار علشان أكوام الزبالة والوساخة تبان ف الكادر .. ومرّة كمان بالليل ف الضلمة وفي الخلفيّة نشغّل أي آلة زي السموك ماشين أو الفوج ماشين أو الستيم ماشين أو الهيز ماشين .. و......

-       بتاعة إيه الماشينات دي كُلّها؟!

-       دي آلات بتطلّع دُخّان أو ضباب ف الباك جراوند علشان ندّي جوْ من الغموض والإثارة زائد إنها ح تكمّل صورة التلوّث اللي ف أُغنية المهرجان.

-       على خيرة الله .. ربّنا يوفّقنا ونطلّع حاجة نضيفة لجمهورنا إن شاء الله.

-       عيب عليك .. ده انا "كابونجا كاسونجا" ملك الكليبّات ف بر "مصر" تِمّاً .. ده انا كمان ح اعمل شُغل جديد في التصوير والإخراج ما حَدِّش عمله قبلي .. الشُغل ده بيعتمد بالكامل على المشاهد السريعة جداً وتقطيع الكادرات وزوايا التصوير قبل ما تكتمل الصورة العامّة للمشهد .. فتخلّي المُشاهد ينهج وهوَّ بيجري وراها وتبرجِله وتروِشه وتزغلِل عينه وتِجهِد عقله .. بالإضافة إلى إني ح اخُد الصور كلّها ف وضع معووج ومش معدول وكمان مهزوز ومرعوش علشان المُتفرِّج يحِس بالارتباك والتشويش وعدم التركيز .. وبالنِسبة للرقص ح اخلّي حركات مجاميع الرقص تبقى متلَهوِجة وكلّها اهتزازات عشوائيّة خشنة من غير أي إنسيابيّة أو توافق .. يعني أشبه بالتشنّجات المرعوشة بتاعة دقّة الزار أو رقص القرود ف الجبلاية أو هياج المجانين في عنبر العقلاء أو تفقير الدراويش ف حلقات الذِكر .. مع وضع الإيدين على الأعضاء التناسليّة أثناء الرقص زي الزنوج.

-       ده شُغل عالي قوي يا سيّدنا .. الظاهر الكليب ده ح يفرقع قوي.

-       على الله التساهيل .. آه بالمناسبة .. الواد "زين المحنتِف" الستايلست ومُصمِّم الملابس ح يجيلك بُكره يقول لك على نظام اللِبس والإكسسوار بتاع الفيديو.

-       آمين يا اسطى .. ح استنّاه بُكره ف نفس الميعاد .. بس قول له ما يتأخَّرش عشان عندي ليلة طهور بدري.

الأحد:

جاءني "زين المحنتِف" وأعطاني كيساً كبيراً به بعض الملابس والإكسسوارات شارحاً لي تصوّره عن الفيديو كليب:

-       بُص يا نجم .. الملابس ح تبقى كاجوال ف مشاهد وجينز ف مشاهد تانية وترِنك (يقصد ترينينج سوت) ف المشاهد اللي فاضلة .. وطبعاً ح تغيّر طول الكليب ف كابات وعرّاقات معصم وتي شيرتات وفاننات من فوق ومنطلونات وبانتاكورات وشورتات من تحت بَس أهم حاجة إنك تسقّطهم تحت وِسطك علشان تبان من تحتهم البوكسرات الملوّنة ولا مؤاخذة.

-       إيش معنى؟!!

-       الموضة كده ده الوقت .. إنت مش بتتفرَّج ع الكليبات الأمريكاني؟

-       ماشي .. طب وبالنسبة للإكسسوارات؟

-       أنا جايب لك ف الكيسة سلاسل تخينة وغوايش وأنسيالات حديد وجلد وخواتم كبيرة وشويّة حِلقان .. تبقى تنقّي منهم اللي يعجبك .. وبالنسبة للي ح تِلبِسه ف رجليك ولا مؤاخذة أنا برضه اشتريت لك كوتشي وسنيكر وبووت .. ح تبقى تبدِّل فيهم.

-       طب وشَعري؟

-       ما تقلقش .. أنا اتفقت لك مع الأسطى "كانيش" ح يظبَّطك .. ح يسيب شعرك طويل زي ما هوَّ .. بَس ح يعمل لك كام ضفيرة وبوكلة وزعرورة كده ع الماشي .. وح يلبِّسك شويّة بونيهات وبندانات وأطواق وأساتك شعر وتوَك ومشابك بِنَس .. وما تنساش تسيب دقنك وتطوِّل ضوافرك وما تستحمّاش أسبوع قبل يوم التصوير علشان "كابونجا" المُخرِج قال لي إننا لازم نخلّي اللوك بتاعك قذر على قد ما نقدر .

-       خلاص .. ح تلاقيني جاهز يوم التصوير على سِنجة عَشرة.

 

 

(يتبع)