أمثال صعيدية عبقرية مهجورة | خلاصة الحكمة والخبرة

صورة واحد شيف تليفزيوني (3)

 

الخميس:

وصلَنا – بالأمر المُباشر – تنويهاً من مُخابرات الدوْلة بأن نقوم بطبخ أكَلاتٍ ذات تكلفةٍ بسيطةٍ لتُناسِب عامّة الشعب الذي يُعاني من أزمةٍ اقتصاديّةٍ طاحنةٍ خصوصاً أن أكلات برامجنا مُستَفِزّة وفي مستوى المواطِن المليونير فقط، وشدَّد التنويه على مراعاة مشاعر غالبيّة الشعب اللي واقفين على تَكّة قبل أن يثوروا ويجيبوا عاليها واطيها.

التعليمات قاطِعةٌ وحاسِمةٌ وصارمةٌ وتُحذِّر من الوصفات المُكلِّفة تحذيراً شديداً وستُراقب الهيْئة العُليا لتنظيم الإعلام كافِّة البرامج لضمان تنفيذ أوامِر المخابرات.

الأحد:

اليوم أوّل حلقةٍ من حلقات برنامجي في الموْسم الجديد بعد أن زاد أجري عشرة أضعافٍ بسبب مجهودي الوافر وطَلَّتي البهيّة وقبولي عند الناس والمُحتوى الجديد المُختلِف الذي أُقدِّمه.

بدأتُ الحلقة وأنا أضع في حِسباني تعليمات المُخابرات وتحذيرات هيئة الإعلام، فقُلتُ بصوْتٍ مبحوحٍ وأنا أرتعِش وعيْنايَ زائغتان:

-       مِسا التماسي على أحلى ناس قاعدة ع الكراسي .. الشيف "سُكَّر حلّة" يُحيّيكُم ويتمنّى لكم جوْعاً مقبولاً وأكلاً شهيّاً .. أهلاً بيكي يا سِت الدار في "أفشخ أكلة مع الشيف حَلّة" .. النهار ده يا حبايبي عايزين نعمل حلقة مُختلِفة .. حلقة مخصوصة علشان الناس الغلابة اللي زاد عددهم ده الوقت لأكتر من تِسعين ف الميّة من تِعداد الشعب .. الناس دول يا جماعة متحرَّم عليهم اللحمة والفراخ والسمك والكافيار .. طبعاً علشان الحاجات دي وصل سعرها لأرقام فلكيّة ما يقدرش عليها إلّا المسؤولين الكُبار ورجال الأعمال والفنّانين ولاعيبة الكورة .. علشان كده قعدت أفكَّر نطبخ إيه النهار ده للناس المطحونين دول .. ومعانا تليفون .. آلو .. أيوه يا سِت الدار اتفضّلي.

-       أنا باحيّيك يا شيف "حَلّة" وبامسّي على كل مُتابعينك.

-       الله يكرمِك .. مُمكِن نتشرّف بإسمِك؟

-       معاك "باكينام" هانم.

-       أهلاً وسهلاً يا سِت الدار .. أأمريني.

-       أن مُتَّصلة بحضرتك علشان اقول لك إن الأسعار فعلاً بقت نار .. شوف كيلو الكافيار البلانش بيلوجا بقى بكام .. ولّا السيمون فيميه ألا جريك بتاع الغلابة .. بقت حاجة لا تُطاق.

-       واللهِ عندِك حق يا سِت الدار.

-       أنا مش عارفة الدوْلة ساكتة ازّاي؟!

-       الحكومة مش فايقة للناس يا "باكينام" هانم .. وللأسف المسؤولين حاطّين إيديهم ف الميّاه الباردة .. والفشل طال كل حِتّة ف البلد.

-       بس ده ما يمنعش إن الريّس برضُه حبيبنا .. وما لوش ذنب ف حاجة.

-       آآآآآ .. آآآ .. طبعاً طبعاً .. الريّس حبيب الكل .. بس اللي حواليه همَّ اللي فشَلة ومش عارفين يديروا البلد.

-       طب سلام بقى .. أصلي ما باتكلِّمش ف السياسة.    

-       ولا انا .. طبعاً السياسة لها ناسها .. وما يصحِّش نتكلِّم فيها .. مع السلامة .. كُنّا بنقول إيه؟ .. آه .. كُنّا بنقول إن أسعار كل السِلَع الغذائيّة بقت ف السما .. السمنة والزيت والرُز والمكرونة والدقيق والسُكَّر والبصل والطماطم والبطاطس والبامية والملوخيّة وكُل الخُضار والفاكهة طبعاً .. ده إذا كانت السلع دي متوفّرة أصلاً وما فيهاش أزمة بين الوقت والتاني .. حتى العدس والفول بقوا بالشيء الفُلاني .. بصراحة ما لقيتش حاجة عِدلة وأسعارها رخيصة غير المِش .. الجبنة القديمة يعني .. وغير إن المِش رخيص فله فوايد عظيمة .. بيحتوي على مُضادّات التهابات طبيعيّة بتزوِّد مناعة الجِسم وخمائر حيويّة بتريّح الجهاز الهضمي .. ده غير الدهون والأملاح والعناصر الغذائيّة اللي فيه .. ويا سلام بقى لو كان المِش مدوِّد .. أيوه طبعاً مدوِّد .. يعني فيه دود .. طبعاً فيه ناس بتقرف وح تقول: "ياي" و"إخّيه" و"يَع" والكلام الفارغ ده .. أحب اقول لهم إن دود المِش ده أنضف منكم .. الدودة من دول نضيفة جداً .. دي ما حَطّتش رجلها ع الأرض يا جماعة .. زائد إنها من المِش وإلى المِش تعود .. يعني بتاكُل مِش وبتعمل بي بي مِش وبتموت ف المِش .. وبعدين الدود ده كُلّه بروتين .. زي اللحمة تمام .. وأكيد ح تبقى فايدة الدود أكبر وأشمل لو كان صاحي وبيلعب .. معنى كده إنك تاكل بروتين طازة وصحّي .. مش عاوز أطوِّل عليكم أكتر من كده ونبدأ على طول في الطبق الحادِق بتاعنا اللي ح يكون مِش بالميّاه بدون إضافات .. يعني مش ح نحُط عليه زيت ولا طماطم ولا بصل ولا فلفل لإن كُل الحاجات دي غالية وبتتكلِّف .. وطبق الحِلو النهار ده ح يبقى صينيّة كريمة المِش بالعسل الاسوِد .. وبرضُه مش ح نحُط غير معلقة صغيَّرة من العسل الاسوِد لإننا كلنا عارفين كيلو العسل الاسوِد بقى بكام حالياً .. بس الأوِّل نطلع لفاصل إعلاني سريع ونلتقي بعد ساعة ونُص على خير .. يا أكَلاتَك يا فَشَخاتَك يا شيف "حَلّة" يا اللي أطعم م الجِلّة .. ما تروحوش بعيد .. تابعونا.

وقبل أن ينتهي الفاصل فوجئنا جميعاً بانقطاع الكهرباء عن مدينة الإنتاج الإعلامي كلّها، واضطررنا للانتظار ساعتيْن دون جدوى فغادرنا الاستوديون في الظلام وانصرفنا إلى منازلنا.    

الإثنيْن:

صحوْتُ مُبَكِّراً على تليفون من رئيس القناة وهو يُبلِغني بأن الهيْئة العُليا للإعلام قد أوْقفت برنامجي للأبد وحوَّلتني للتحقيق، مِش عارف ليه؟!!!