أقول لكم إيه ولّا أيه عن جبنة
"بويتي" .. أطعم جبنة ف "مصر":
-
من ناحية الطَعم:
"بويتي" ألذ طعم جبنة ف العالم .. لإنها خليط من أنقى منتجات الألبان
والبويات المستخدمة في التشطيبات على أوسع نطاق .. فيه منها بطعم الجاز والتينر وطعم
الجير المطفي وطعم السلاؤون المدخّن وطعم الورنيش المنعش والطعم الجديد اللي ح
تاكل فُرشتك وراه: معجون الجبن الفرنسي المطبوخ بنكهة السبيداج المشطشط.
-
من ناحية الشكل:
"بويتي" أشيك علبة جبنة فيكي يا "مصر" .. وكل طعم له لون
مختلف وتصميم مميّز .. ده غير ألوان العلب البلاستيك الجديدة النص لَمْعَة زي السبونج
والبيرل والقطيفة والترخيم والاستوكا انتيكا.
-
من ناحية القوام:
"بويتي" جبنة كريمي مزبّدة وما بتتفرفِتش وسهلة الفَرْد والمَط تماماً
.. ولو ح تعمل ساندويتش سريع فممكن تسحب الرغيف سكّينة واحدة بس كبطانة (بدون ما تحتاج تقشير
أو سنفرة) وبعدين تدهن الرغيف أو التوست وشّين أو تلاتة فقط علشان تستمتع بأحلى جبنة.
-
من ناحية القيمة الغذائيّة والنضافة والجوْدة
والشروط الصحيّة: "بويتي" جبنة غنيّة بفيتامين "د" والكالسيوم والسبرتو مع القليل من الأكاسيد الملّونة والإضافات المساعدة من مكسبات الطعم واللون .. ولازم تطمّن تماماً إن الجبنة بتتم تعبئتها آلياً بدون ما تلمسها
إيد بَشَر وتأكّد من إن الجبنة بتطلع من المصنع إلى العلبة ع الباستيلّا ع الرولّة مباشرةً.
مش أي جبنة تبقى "بويتي" ............ "بويتي": لأنك تستحق الأفضل.