أمثال صعيدية عبقرية مهجورة | خلاصة الحكمة والخبرة

"للحب آلهةٌ كثيرة" | الفصل الرابع (1)

 

مرّ شهران لا غير وذات يومٍ من الأيّام وصلت "كريم" وهو يعمل في عيادته مكالمةٌ تليفونيّة من زميلٍ له :

- آلو .. السلامُ عليكم.

- وعليكم السلام ورحمة الله وبركاته.

- إزايّك يا دكتور "كريم" .. معاك دكتور "سعيد السباعي" .. دكتور جراحة المسالك البوليّة وزراعة الكلى.

- أهلاً أهلاً يا باشا .. طبعاً طبعاً .. سيادتك نار على علم .. أأمرني يا افندم.

- الأمر لله .. واللهِ يا دكتورنا أنا باتّصل بسيادتك بخصوص المريضة "عبير السيّد" .. فاكرها؟

- آآآ .. أيوه طبعاً .. خير؟ .. فيه حاجة؟

- للأسف مش خير .. المريضة دي حالتها ساءت جداً .. والكليتين بتوعها دخلوا ف كومبليت رينال فيليار ووصلوا للإند ستادج .. يعني ما بقوش نافعين خلاص .. والغسيل الكلوي بقت بتعمله ده الوقت يوم بعد يوم وساعات يوميّاً أو مرّتين ف اليوم .. دي الأسبوع اللي فات بس دخلت ف يوريميك إنكيفالوباثي مرّتين بعد ما الكرياتينين كليرنس نزل لحد خمستاشر ولحقناها بالعافية قبل ما تدخل ف هيباتيك كوما .. وللأسف حياتها أصبحت ف خطر لو ما عملنا لهاش عمليّة زرع كلية ف أقرب وقت.

- لا حول ولا قوّة إلّا بالله .. ويا ترى هيَّ اللي طلبت من سيادتك تتّصل بيَّ؟

- بالعكس .. ده انا سألتها كانت بتتابع حالتها مع مين قبل كده لي قالت لي مع حضرتك فقلت لها تجيب لي ملفّها من عندك علشان أضمّه للملف اللي عندي وابقى مُلِم بحالتها بالتفصيل .. لكن هيَّ رفضت تروح لك أو تخلّيني اتّصل بيك فاضطرّيت أجيب نمرة عيادتك م الدليل.

- إممممم.

- أصلها قالت لي رغم إن سيادتك دكتور ممتاز وخدمتها كتير بس للأسف حصل بينكم خلاف أو سوء تفاهم أو حاجة زي كده .. هيَّ بصراحة ما رضيتش تقول لي بالظبط إيه هوَّ السبب .. بس اللي انا فهمته منها إنه خلاف مادي مع إدارة المستشفى اللي حضرتك كنت بتعالجها فيها .. الظاهر زوّدوها معاها ف مصاريف الغسيل الكلوي .. مع إنها ست لارج وما تهمّهاش الفلوس زي ما لاحظت.

- فعلاً .. الحكاية كده بالظبط .. آآآ .. هيَّ اتخانقت مع إدارة المستشفى علشان بالغوا ف الفاتورة أيّام ما اتحجزت عندهم آخر مرّة وهيَّ ما تحبّش الاستغلال .. آآآ .. حتى طلبت مني أعالجها ف مستشفى تانية وانا رفضت لإني ما باتعاملش غير مع المستشفى دي من زمان .. عموماً يا ريت سيادتك ما تقول لهاش إنك كلّمتني وانا ح ابقى ابعت لك الدوسيه بتاعها اللي فيه نتايج الكشف والتحاليل والأشعة والعلاج.

- ألف شكر .. بس انا باتّصل بحضرتك علشان حاجة تانية.

- خير؟

- حضرتك عارف إنه سهل قوي نشتري لها كلية من أي حد مصري أو سوداني أو أفريقي .. ده حتى سعر الكلية نزل اليومين دول من عشرين لعشر آلاف جنيه .. من كُتر الكلاوي المعروضة للبيع .. الناس ضربها السلك والفُقرا مستعدين يبيعوا أي عضو من أعضائهم علشان يعيشوا ويقدروا يربّوا عيالهم ف الزمن ده .. بس مدام "عبير" مصرّة إنها ما تعملش زرع كلية إلّا من واحد متبرّع حقيقي بدون مقابل علشان ربنا يبارك لها ف صحّتها وما تبقاش مخالفة للقانون كمان.

- طب ما هو صح كده .. ياما مرضى عملوا زرع كلى وجسمهم رفضها وماتوا علشان ربنا عاقبهم لإنهم اشتروا أعضاء من ناس مش من حقّهم يتاجروا في أجسامهم اللي مِلك ربنا اللي خلقهم من عدم.

- عامّةً ده رأيك ورأيها .. إنتم أحرار.

- ليه هوَّ حضرتك شايف غير كده؟

- واللهِ انا شايف إن التبرّع زي البيع .. ما هو اللي بيتبرّع ده بيتصرّف برضه ف حاجة مش مِلكه .. لو مشينا على كده يبقى لا ح نروح ولا ح نيجي .. المهم: حضرتك بتتعامل مع مرضى الكلى اللي لهم قرايب حاسّين بمشكلتهم وعارفين قد إيه التبرّع بالكلى بيحل مشكلة المريض وبيحييه من جديد .. أنا نَفسي بقى لي عشرين سنة باتبرّع بالدم كل ست شهور من يوم ما حسّيت بمشكلة أمي الله يرحمها لمّا جا لها السرطان وكانت بتحتاج لنقل دم كل شويّة .. فلو حضرتك تتكرّم وتعمل إعلان ف العيادة أو المستشفى عن متبرّع بكلية يبقى كتّر خيرك .. مين عارف .. يمكن الإعلان يجيب نتيجة .. أصل الإعلان اللي عملناه ف الجرايد وع النِت ما حدّش عبّره إكمن التبرّع ببلاش .. حتى أهل مدام "عبير" ما رضوش يتبرّعوا لمّا قالت لهم على حالتها .. كلّهم خايفين على نفسهم .. اللي اتحجّج بإنه كبير ف السن واللي قال إن عنده السكّر واللي قال إن عنده الضغط واللي قال التبرّع أصلاً حرام ومش عايز يغضب ربّنا .. ده حتى جا لي اخوها شقيقها وقال لي إنه مستعد يتبرّع لها بكليته بس مش ح ينفع علشان فصيلة دمّه غير فصيلة دمّها .. فقلت له إن تطابق الفصيلة والأنسجة ما بقوش يهمّوا ده الوقت بفضل الأدوية الحديثة اللي بياخدها المريض وتمنع جسمه من لفظ الكلية الجديدة مهما كان الاختلاف .. وقلت له إنه يقدر يتبرّع برضه .. فقال لي خلاص ح اجي لك بكرة علشان نبدأ الإجراءات .. ومن ساعتها ما ظهرش .. فص ملح وداب .. الدور والباقي عليك انت يا دكتور "كريم" .. ربنا يجعل الفَرَج على إيدك إن شاء الله.

- حاضر .. الله المستعان .. أنا من ناحيتي ح اتصرّف .. وربّنا يقدّم اللي فيه الخير.

- طب يا سيدي الله يكرمك .. عموماً تليفون العيادة بتاعتي 2273644 .. لو وصلت لحاجة اتّصل بيَّ من ستة لعشرة أي يوم ما عدا الجمعة .. وربنا يوفّقك إن شاء الله .. السلامُ عليكم.

- وعليكم السلام .. مع السلامة.

 

 

(يتبع)