"السيسي" يفتح قلبه "لابن أبي صادق" (4)
- بالنسبة
للفجوة الفظيعة بين الأسعار وبين دخل الأسرة حضرتك ح تعمل فيها إيه؟ .. الناس
استوت يا ريّس.
- واللهِ
عارف .. بس اعمل إيه .. الدولة مواردها محدودة .. أنا لو عليَّ عايز الناس كلها
تبقى مليونيرات .. ههههه .. ع الأقل ح آخد منهم ضرايب قد كده.
- لكن يا ريّس فيه حاجات كتير ما تدلّش على إن مواردنا محدودة .. اسمح لي يعني الحكومة بتصرف مبالغ كبيرة في حاجات ما لهاش لازمة زي المؤتمرات والحفلات اللي كل شهر والتاني وزي العاصمة الإداريّة والمدن الجديدة وزي القصور الرئاسيّة وزي بناء أعداد كبيرة من السجون وزي الـ....
- الله الله
الله .. إنت ح تلخبط في الكلام ليه يا دكتور .. ما تخلينيش اقوم ارميك ف البحر
أومّال.
- لا يا ريّس ده انا ما
اعرفش اعوم .. وبعدين ده انا حبيبك .. ده احنا عِشرة بقى لها ربع ساعة ده الوقت.
- ههههههه .. انت
بتتكلّم جد؟ .. اسكندراني وما تعرفش تعوم! ..واللهِ عيب عليك.
- أومّال بقى لو
تعرف كمان إني مولود في السويس.
- ههههههه .. يا
راجل!! .. لا لا ما تخافش .. أنا باهزّر معاك .. بس بصراحة باخد على خاطري م الناس
اللي بيرددوا كلام وخلاص .. المؤتمرات دي بيبقى لها رعاة همَّ اللي بيصرفوا عليها
من غير أي تكاليف ع الدوْلة وبتبقى كمان دعاية لسياحة المؤتمرات اللي بنحاول بيها
ننشّط حركة السياحة ككل .. والعاصمة الإداريّة دي بقى مش ح تعرفوا قيمتها ده الوقت
.. ح تدعوا لي بعدين .. آديك شايف "القاهرة" بقت عاملة إزاي .. يا راجل
ده فيها كباري تلات اربع أدوار ومش مكفيّة .. كان لازم نشوف لها حل جِذري .. وبرضه
الدوْلة متحمّلة الأراضي والمرافق والباقي داخل معانا فيه دول ومؤسسات وشركات
عملاقة مصريّة وعربيّة وأجنبيّة .. وبالنسب للقصور الرئاسيّة فدي من باب تحسين
مظهرنا أمام ضيوفنا .. يعنى عايزني آخد شقق رئاسيّة مثلاً ولّا ابني أكواخ
رئاسيّة؟ .. وبعدين هوَّ انا ح اخد القصور دي معايا ف جيبي؟ .. ما هي موجودة رصيد
معماري وفني للبلد .. إنما بقى حكاية السجون دي ما لكش حق فيها .. هوَّ احنا بنبي
سجون وبس؟ .. إيش مِعنى ما اتكلّمتش عن المدن والعمارات والمدارس والمساجد
والكنايس والمستشفيات والمصالح والمصانع والطرق والكباري والمدافن كمان .. ما هي
السجون دي جزء من المتطلبات الإنشائيّة والإنسانيّة لأي بلد .. وهوّ يعني بناء
السجون دليل على إني ح احبس الشعب كلّه؟ .. يعني لو عملنا كذا جبّانة تقولوا
"السيسي" ح يموّت الشعب كله!!
- ............
- مالك؟ .. سِكِت
ليه؟
- أصلي مكسوف اقول
لحضرتك إن فيه حاجات ف كلام سيادتك اقتنعت بيها وحاجات تانية مش قادر اقتنع بيها.
- زي إيه؟
- يعني اللي يخلّي سيادتك تقدر تجمع رعاة علشان يصرفوا ع المؤتمرات طب ما تخلّيهم يصرفوا على حاجات تانية أنفع للمواطن .. يبنوا مستشفيات أو مدارس مثلاً بدل ما يبقى عندنا عجز في سراير وإمكانيّات المستشفيات الحكوميّة أو عجز في الفصول وتكدّس الطلّاب في المدارس.
- أنا
مش طالب من كل الناس إنها تكون مقتنعة بيَّ وبشغلي .. ما فيش حد الناس بتكون
مجتمعة عليه على طول الخط .. أنا باجتهد على قد ما باقدر ويمكن بيجانبني الصواب أو
التوفيق في بعض الأحيان.
- أنا
بابص للموضوع من ناحية الأولويّات .. يعني المفروض إن احنا نستثمر في البشر قبل
الحجر.
- يا راجل يا جاحد .. أومّال
مشروع تطوير التعليم ده إيه؟ .. مشروع تطوير العشوائيّات ده إيه؟ .. مشروع التأمين
الصحي الجديد ده إيه؟ .. وبعدين يا سيدي افرض إني اهتمّيت شويّة أكتر بالبنية
التحتيّة والمشروعات الهندسيّة علشان ح تجيب لنا عائد اقتصادي سريع .. إيه كفرت ..
مش أحسن ما يبقى لا فيه كده ولا كده.
- بس نسبة الفقر زادت وناس كتير بتعاني في تسيير أمور بيتها .. مش كانوا دول أوْلى؟
- للأسف كلامك صح .. لإن الناس ده الوقت بتدفع تمن البغددة بتاعة زمان .. ما كانش ينفع استمر في سياسة اللي قبلي .. الناس كانت واخدة على دعم كل السلع والخدمات لغاية ما الدوْلة قاربت على الإفلاس .. فِكرك يعني أنا ما كنتش اقدر اقول يلّا نفسي وأكمّل في سياسة الدعم لغاية ما نروح في ستين داهية؟ .. أنا فضّلت إني أواجه مشاكل عهود زمان ومشاكل ده الوقت في عهدي وما فكّرتش لحظة في إني باغامر بشعبيّتي علشان أطلّع البلد من المستنقع اللي احنا فيه من الستينيّات .. كان ممكن أفكّر إن الناس ح يدعوا عليَّ ويفتكروا إن انا السبب في ده .. لا واللهِ .. لا واللهِ .. أنا همّي الأكبر البلد مش نفسي .. والحق يتقال إن انا صحيح أخدت قرارات مصيريّة صعبة بس اللي استحمل وعدّى البلد لبر الأمان همَّ الناس اللي انت بتقول عليهم فقرا .. خلّيني أوجّه لهم كل التحيّة والشكر على حبهم لبلدهم وتضحياتهم علشانها.