رسالة من قُطّة فى شَقّة إلى قُطّة على سلالِم الخَدَم
أُختي العَزيزة اللي ما باعرَفش
اسمها
لكن باشوفها اليوم بحالُه
قُصادى ع السِلِّم
بعد التحيّة والسلام ...
باكلِّمِك من شَقّة "أحمد
بيه عليش"
فأنا باحبِّك
ليه؟ .. ما انيش عارفة
يمكن عشان ما انتي مُكافحة وطيّبة
أو أي شيء!!!
وباحسِدِك
حقيقي والله باحسِدِك
يمكن ف دي ما تصدَّقيش
يمكن تقولي عنّي يعني ازّاي؟
إزّاي كده حالتي الماليّة كويّسة
وعيشتي عال
إن قٌلت آي
تِلقي الجميع حواليّا يجري
وألف دُكتور جاي حِداي (عندي)
وبانام على فراش وَثير
بيغسلوا شَعري بكولونيا
كولونيا م المستَوْرَدة
والبِس فيونكات من حرير
ولا عمل ليّا
وأَكْلي – يا صاحبتي – آخدُه
ساعات ع السُفرة
وساعات ف السرير
عايشة ف نَعيم .. لكِنُّه سِـجْن
وانتي حُـرَّة ومِلْك نَفْسِك
صَدَّقيني .. نَعيمي سِـجْن
لكن انتي مُنطَلِقة ف حياتِك
ياصديقتي الطيّبة
صحيح – يا أُختي – مَظْهَرِك مَظْهَر
فقير
وصحيح بتِشقي لاجل عَضْمة
كتير باشوفِك وانتي عايشة يوم مَرير
أطفال تطاردِك والخَدَم والبوّابين
لكن باشوفِك فى النهاية قُطّة حُـرَّة
أنا ساعات .. وساعات كِتير
بامرَض لإني عاجزة امارِس الخروج
والجَري بَرَّه
لا مَعنى لِلُّقمة إذا ماكانتشي
حِلوة مَرَّة
مُرَّة مَرَّة
لا مَعنى للحياة إذا ما كانِتشي
رِحلة جَميلة بين الحُزْن والمَسَرَّة
أنا باحسِدِك على صِـحِّتِك
فأنا تَمللى فى مَرَض
لكن انتي دايماً شابّة وقويّة
وسعيدة
وف النهاية
رَبِّنا يديمها عليكي عيشة
ورَبِّنا يديمها عليكي صِـحّة
أمّا أنا ...
فأديني مَحبوسة هِنا
وكأنه مكتوب لي اعيش
فى عيادة أو مَصَحّة
إمضاء: أُختِك القُطّة
"لولي" اللى ف الشبّاك اللى قُصادِك.