أسباب طفشان المصريين من وطنهم
طب كمّل بقى يا عمّور وقول على السبب اللي بيخلّي أعداد مذهلة من المصريين يقدّموا على يانصيب الهجرة لأمريكا والطفشان من مصر للأبد في محاولة بائسة لإنقاذ أسرهم وأطفالهم من الحياة في وطنهم وإيجاد وطن بديل في الغربة؟ .. تفتكر ليه المصريين مش طايقين البلد وعايزين يغوروا في أي مصيبة بعيد عنها؟ .. يا ترى علشان مصر واحة للحريّة والعدالة الاجتماعيّة والمساواة الدينيّة؟ .. ولّا علشان المواطنين عايشين زي الملوك في بلدهم ومش عارفين يصرفوا فلوسهم فين؟ .. ولّا علشان وصلوا لمرحلة متقدمة من الرفاهية والرخاء؟ .. ولّا علشان حياتهم في منتهى السهولة بس محتارين يقضّوا الويك إند بتاعهم فين؟ .. ولّا علشان ما فيش مشاكل بتقابلهم في الأكل والسكن والتعليم والعلاج والأمن والمواصلات وفرص العمل والخدمات الآدميّة؟ .. صحيح يا عمّور: اللي اختشوا ماتوا .. ربنا يديك طولة العمر إنت وأسيادك.