الفصل الأوّل | نهاية العالم (3)
الخميس 1 / 10 / 2020
باقي عشرة أيّامٍ على النهاية
وانتهى الموجز الذاخر بالمذابح والقتل
والتنكيل، وكانت تلك هي عادة أي عرض للأخبار؛ فقد كانت نشرات الأخبار منبعاً
للكوارث ومرتعاً للمصائب ولم تكن- هذه الأيّام- سوى مدعاةً لكل ما هو محزنٌ وكئيب،
وبعد فقرةٍ إعلانيّة فاقت الخمس دقائق استغلّها "باسم" في ارتشاف باقي
قدحه عادت المذيعة اللامعة وعلى وجهها ابتسامة واسعة احتلّت مساحة معظم وجهها
الرقيق الذي اعتاد على الابتسام رغم الأخبار المسمومة التي تذاع، وقالت المذيعة
بهدوء وهي تصطنع التفاؤل والبهجة:
- صديكاتي أصدكائي.. صباح الخير عليكم.. صباح
الخير على كل فلاح.. صباح الخير على كل عامل.. صباح الخير على كل أب وأم.. صباح
الخير على كل بنت وولد.. الورد بيضحك ع الأغصان.. والزهر بيسلّم ع الأفنان.. صباح
التفاؤل والإشراك.. صباح الأمل من الأعماك.. طبعاً سمعنا الخبر الرئيسي بتاع
حلكتنا النهار ده.. يعني إيه تفسير الخبر علميّاً؟.. ويا ترى تأثير ده إيه على
الأرض والكمر واحنا بالتحديد؟.. وأسئلة كتير بتدور في عكل كل واحد منّا.. وح
يجاوبنا عليها كلّها الدكتور "شتا مـحمد مطر" خبير الأرصاد الجويّة
ومدير مرصد "حلوان" السابك.. أهلاً بيك يا فندم.
- أهلاً بحضرتِك.. كل سنة وانتي طيّبة
بمناسبة أعياد أكتوبر المجيدة.
- وحضرتك طيّب.. ياترى ح نحتفل بيها السنة
الجايّة ولّا مش ح يبقى فيه السنة الجايّة أساساً؟
- إن شاء الله ح نحتفل بيها السنة الجايّة
واللي بعدها واللي بعد بعدها.. لغاية ما تشوفي أولاد أولادِك زيي كده.
- ياااه.. مش باين على حضرتك جِد خالص.
- لا.. ده انا جِد من زمان وعندي حفيدتين من
ابني "رعد": الكبرى اسمها "رباب" والصغرى اسمها
"شمس".
- ربّنا يخللي.
- ويخلّي لِك.. المهم انا مش عايزِك تصدّقي
الكلام اللي بيتداوله الناس ع النت.. الخبر واضح جداً.. الأرض مش ح يحصل لها أي
حاجة واحنا ح نبقى بخير إن شاء الله.. غاية ما هناك إنّنا ح نفقد القمر نهائيّاً.
- طب وده شويّة يا دكتور.. دي الناس ح تتجنّن
على تويتر.. اسمع سيادتك كاتبين إيه: دكتور "علاء الأسواني" كتب: أمريكا
هي الوحيدة التي سبكت في الكشف عن المذنّب "المميت" صحيح الديمقراطيّة
هي الحل.. أستاذ "سليم العوّا" بيسأل ف التويتة بتاعته: هل تفكد الأرض
شرعيّتها بدون الكمر؟.. المهندس "عبد المنعم الشحّات" كتب: الكمر أصلاً
حرام.. دكتور "عصام العريان" بيتسائل: معكول مافيش كمر بعد كده؟ أين
البرلمان؟.. الناشط السياسي "محمّد أبو حامد" بيطلب محاكمة أعضاء
الجماعة المحظورة لمسئوليتها المباشرة عن الانفجار الشمسي وباقي أعمال الإرهاب
التي من شأنها زعزعة الاستكرار في "مصر".. الفنّان "أحمد عز"
كتب: يعني انا لمّا اشوف بنت زي الكمر ح اكول لها إيه؟ إيه المذنّب ده؟!!.. الكاتب
الساخر "أحمد رجب" كتب ف نص كلمة: وداعاً مشروب "كمر الدين"
في رمضان، من هنا ورايح ما فيش غير "مذنّب الدين" وبس.
- وكمان ح تبقى فيه مشاكل كتير من غير القمر
اللي أخدنا على وجوده.. يعني مثلاً مش عارف دار الإفتاء ح تحدّد أوّل رمضان إزاي
بدون استطلاع الهلال.. مشكلة فعلاً.
- ومعانا مداخلة تليفونيّة من الشاعر الكبير
"جمال بخيت".. أهلاً وسهلاً.. آآآآ.. لو سمحت توطّي صوت التليفزيون
شويّة.
- أهلاً بيكي يا ست الكل.. أنا شايف إن أكتر
ناس ح تنضر من عدم وجود القمر همّ الشعراء.. ح ينظموا شِعر أو زجل إزاي من غير
القمر؟.. والعشّاق ح يسهروا لمين؟.. الحياة ح يبقى دمّها تقيل قوي.. القمر ده له
قيمة معنويّة أكبر كتير من قيمته الماديّة.. أنا اتأثّرت قوي بالموضوع ده وكتبت
قصيدة بتقول:
يا
اللي بتحبوا القمر
وف
سناه يحلى السمر
وف
ضياه طال السهر
شوفتوا
إيه آخر خبر؟
قالوا
المذنّب ده قدر
جاي
وبكل الخطر
يمحي
من عينّا النظر
للقمر
ويجور عليه
دين
أبوكم اسمه إيه؟
لو
صحيح عاشقين
ع
القمر متعوّدين
بتحلموا
أو سهرانين
تقدروا
تقولوا لي مين
ح
يسامركوا يا محرومين؟
قوام
نسيتوا المعشوقين
الولهانين
المغرمين
كرهتوا
الحب بس ليه؟
دين
أبوكم اسمه إيه؟
- الله الله.. زجل رائع من شاعرنا المثكّف
"جمال بخيت" اللي بنشكره جداً.. وبنرجع للدكتور "شتا" وبنسأله
إيه رأي علماء الفلك المصريّين في موضوع المذنّب ده؟
- في الواقع رأيهم في منتهى الأهميّة لإننا
لا نقل علم وكفاءة وخبرة عن العلماء الغربيّين.. خلليني اقول لِك إن أستاذنا
الدكتور "نجم الدين الزحلاوي" تنبّأ بالموضوع ده بالتفصيل لمّا قال إن
مدار برج الدلو ح يتقاطع مع مسار برج التور وده ح يؤثّر على ارتفاع الدرجة
السماويّة وقت الولادة ممّا يعني تداخل عناصر الكون الأربعة: الماء والهواء والنار
واليابس.. وكمان الدكتورة "كـوْكب منير" أكّدِت إن مواليد برج الحمار
الصيني قدّامهم سكّة سفر بعد نقطتين أو تلاتة.. أما رأيي الشخصي فممكن تلخيصه في
إن النهار ده ح يطلع حر بسبب انتشار الشبّورة على أنحاء متفرّقة من البلاد مع
تهيّؤ الفرصة لهطول بعض الأمطار الرذاذيّة والرياح الشماليّة الغربيّة نتيجة
وقوعنا تحت منطقة ضغط جوّي منخفض يؤدّي لتغيّر الظواهر المناخيّة المعتادة وارتفاع
درجة الحرارة عن معدّلاتها الطبيعيّة في مثل هذا الوقت من العام.. واللهُ أعلم.
واستمرت هذه الحلقة الشيّقة من برنامج "صباح الخير يا مصر" أكثر من ساعتيْن متواصلتيْن مليئتيْن بالإثارة والمتعة وتنوّع الضيوف الذين تناولوا وتداولوا قضيّة المذنّب "الماحق" من جميع الجوانب للدرجة التي دفعت "باسم" لأن يغط في سباتٍ عميق على الأريكة فلم يشعر إلا بزوجته تهزّه في رفق لتوقظه حتّى يستكمل نومه على فراشه.