أخيراً عرفنا حقيقة رؤساء العالم الزواحف وجماعة الإخوان الفضائيين
الدكتور ده (الله أعلم واخد دكتوراه ولّا لأ ..
وواخدها من فين) حقق شهرة واسعة الفترة السابقة وكل القنوات الفضائية والصحف فردوا
له مساحات واسعة ضمن خطة ممنهجة لنشر الخزعبلات زي مجلس إدارة العالم كده علشان
بيقول لك إحنا في عصر الدلو (الجردل لا مؤاخذة) .. وإن فيه ناس شافوا بوش وهيلاري
كلينتون وهمًّ بيتحولوا لزواحف .. وإن ما فيش حاجة اسمها شياطين ولا ملائكة .. وإن
الأديان السماوية ما هي إلّا مؤامرة .. وإن البشر معمول لهم غسيل مخ من آلاف
السنين .. وبيقول كمان إن الفضائيين "قادمون" خلال سنتين تلاتة .. باين
عليهم زملكاوية زي حالاتي على أساس إن "الزمالك قادم" .. مساء الخييييييير يا عسل.
اللذيذ إن المذيعة لم تنسَ هاجس الإخوان (حسب
التوجه الإعلامي القومي) فسألته: يا ترى الفضائيين جابوا سيرة الإخوان المسلمين؟
.. فالدكتور جاوبها (بمنتهى العقل) بإن الفضائيّين ما جابوش سيرة الإخوان تحديداً
بس معروف إن اللي بيحرّكهم الماسونية والشيوعية والصهيونية العالمية وباقي أذرع
قوى الشر المهلبيّة.
نفسي الإعلام ينسى الإخوان بقى .. إحنا كده بنضخّم من حجمهم بلا داعي .. هم مجرّد فصيل سياسي فشل في الحفاظ على حكم البلاد بغض النظر عن الأسباب .. ليه بنحشرهم في كل حاجة ونصوّرهم للناس على إنهم خارقون ونحيطهم بهالة غامضة هم بصراحة لا يستحقونها .. ما كفاية اللي همَّ فيه.