مارس 2018 :
كل سنة والدنيا بخير .. النهار ده 14 مارس:
عيد ميلاد الـ "ط" .. لأ أنا كاتبها صح .. "ط" .. اللي هيَّ
بتاعة "ط نق تربيع".
"باي" أو "ط"
أو ثابت الدائرة هو ثابت رياضي يستخدم في علوم الرياضيات والفيزياء بشكل
مكثف والرمز مأخوذ من الحرف الإغريقي الصغير "باي" .. ويعرف هذا العدد
أيضا باسم ثابت أرشميدس .. ويساوي تقريبا 3.14159 أو 22 على 7.
أمريكا بتحتفل بالعيد ده منذ 1988 عندما
أقامه عالم الرياضيات "لاري شاو" (الراجل أبو شعر مضروب في الخلاط اللي
في أوّل صورة) .. بس الأمريكان منقسمين جماعتين : الأولى بتحتفل بيه يوم 14 شهر 3
(على أساس إنه بيساوي 3.14) والتانية بتحتفل بيه يوم 22 شهر 7 (على أساس إنه
بيساوي 7/22) .. واللي فتح جووجل النهار ده ح يلاقيهم مغيّرين شعارهم احتفالاً
بالـ "ط" .. وفي يوم العيد ده بيتم أكل جميع أنواع الفطائر والتورتات
والبيتزا (واللي بيتعمل على أسعارهم تخفيضات هائلة وبتوصل سعرها لـ 3.14 دولار
فقط) وتتم إقامة المؤتمرات والندوات للتعريف بأهمية هذا الثابت الرياضي الذي حل
المعضلة القديمة جداً والمتمثلة في تربيع الدائرة.
يا ترى همَّ هُبل واحنا مخنا كبير .. ولّا همَّ اللي مخهم كبير واحنا اللي هُبل .. أنا شايف إنه عيد بينم عن منتهى التفاهة والهيافة .. الدنيا فيها حاجات أهم من الكلام الفاضي ده .. أنا عن نفسي ح احتفل النهار ده بحاجة أهم بكتير وأثّرت على مسار الإنسانية جمعاء جمعاء جمعاء .. اللي هوَّ يوم عرض (في 1932) فيلم أولاد الذوات وهو أول فيلم عربي ناطق .. يا حلوللي يا حلوللي.