بعد تواتر أنباء عن زيادة أسعار المياه الغازية (الكانزاية بستة جنيه واللتر باتناشر جنيه والحسّابة بتحسب) صرّح عم "بشندي" (هوَّ راجل أرزقجي على باب الله بس اللي بيسأله على شغلته بيقول أعمال حرّة) لمراسل "أخبار ملهلبة" قائلاً: "يا باشا احنا في جِلّة ولّا في شَم ورد .. إحنا ف إيه ولّا إيه؟ .. كازوزة إيه في الزمن الاغبر ده؟ .. مش مهم .. يزوّدوا أسعارها زي ما همَّ عاوزين .. إحنا ما بنشتريهاش أصلاً .. لمّا نلاقي ناكل الأوّل يا بيه نبقى نهضم .. وعلى رأي المثل "كَلْنا إيه نشرب عليه؟" أهم حاجة ما يغلّوش الفول والعدس والبتنجان ولا مؤاخذة .. ده احنا ح تعدي علينا أيام صودا ح نشرب فيها من كيعاننا وياما ح نتكرّع".