الفصل الأوّل | نهاية العالم (1)
الخميس 1 / 10 /
2020
باقي عشرة أيّامٍ
على النهاية
كانت عقارب الساعة تشير إلى تمام السادسة
صباحاً عندما غرس "باسم" مفتاحه في باب شقّته فانفتح محدثاً صوت صريرٍ
مكتوم فولج "باسم" - ذو الواحد والأربعين ربيعاً - بخفّة إلى الصالة ثم
أغلق الباب بهدوء وعبر إلى داخل حجرة نومه فألفى زوجته "أسماء" تغط في
نومٍ عميق، وبدأ في خلع بزّته الأنيقة وارتداء بيجامته الحمراء محاولاً عدم إحداث
أيّة جلبةٍ تتسبّب في إيقاظ زوجته الحامل في ثمانية أشهرٍ وتوشك أن تستقبل
مولودهما الثالث، ورغم ذلك فقد استيقظت فجأة عندما ارتمى "باسم"- دون
قصد- بثقل جسمه المترنّح فوق السرير فلم يستطع الحفاظ على توازنه أثر ما تناوله من
بعض أنواع الخمور التي اعتاد على تجرّعها منذ زمن بعيد، فنهضت "أسماء"
من رقادها وعمدت إلى الستائر وفتحتها فغمر ضوء النهار أركان الغرفة ودار بين
الزوجين هذا الحوار:
- إيه اللي بتعمليه ده يا شيخة؟.. مش شايفاني
لسّه ح انام؟
- نوم إيه ده الوقت!.. ده يا دوب ألحق أصحّي
العيال والبّسهم وافطّرهم قبل ما تروح توصّلهم المدرسة وتروح على شغلك.
- وصّليهم انتي.. أنا مش رايح الشغل النهار
ده.
- ليه كفى الله الشر؟.. إنت عيّان؟
- لا أبداً.. بس راجع تعبان.
- آه.. تعبان!!.. وتلاقيك شربت زي عوايدك.
- يييييه.. ح تبتدي بقى الموّال بتاع كل
يوم.. كام مرّة اقول لِك إن شغلي كمحرّر فني ف جريدة "الضياء" بيحتّم
عليّ إني أحضر كل السهرات الفنيّة.. ولازم آخد لي كاسين مع بقية الفنّانين ونجوم
المجتمع علشان أجاري الجو.. أومّال عايزاني أشرب عرقسوس زي الفلّاحين.
- يا ريتنا يا خويا فضلنا ف الفلّاحين وعشنا
عيشة أهلنا.. وكانت سهرة إمبارح فين بقى إن شاء الله؟
- ده كان عيد ميلاد "بوسة"
الرقّاصة.. بس إيه.. كانت ليلة ولا ألف ليلة وليلة.. دي الحفلة كانت مليانة
ممثّلين ومطربين وصحفيّين وسياسيّين ولّاعّيبه كورة وعالم تاني خالص.
- يا سلام!.. كل ده علشان حتّة رقّاصة؟
- حتّة؟.. إنتي مش عايشة ف البلد ولّا إيه؟..
دي نجمة السينما والمسرح والإذاعة والتليفزيون والبوتاجاز كمان.. دي معاها فلوس قد
هرم خوفو.. ولّا القصر بتاعها اللي ف "الرحاب".. تحفة.. إوْعدنا يا رب.
- يا شيخ تغور الفلوس اللي تيجي م السكّة دي.
- طب غوري انتي اعملي لي فنجان قهوة علشان
افوق.. منّك لله طيّرتي النوم من عيني.. عنده حق كابتن "زيكو" لمّا قال
لي إن الستّات ما يجيش من وراهم غير وجع الدماغ.
- "زيكو"؟.. هوّ كان سهران
معاكم؟.. مش ده كابتن كورة وبينام بدري؟
- يا وليّه هوّ بقى فيه لاعّيب بينام بدري
اليومين دول؟
- مش المفروض يحافظ على صحّته؟.. ده رياضي.
- كنتي جيتي تشوفي الرياضي ده وهوّ بيشرب
ويسكي معانا.. ما هو خد قعدته ع الترابيزة بتاعتنا اللي كان فيها "كريم
شوكت" الممثل و"إسلام المفتي" المطرب.
- "كريم" اللي مثّل دور الشيخ
"المنشاوي" ف رمضان اللي فات؟.. و"إسلام" بتاع أغنيّة
"أنا بين إيديك يا خالقني"؟
- أيوه همّ.. يا بنتي باقول لِك كل الناس
المشهورين بقوا كده ده الوقت.
- طبعاً لأّه.. فيه ناس مشهورين وربّنا
عاصمهم م البلاوي دي.
- قولي لي كده على واحد بس من نجوم المجتمع
والصالونات ما بيروحش السهرات دي وما بيعملش زي ما بنعمل.
- عندك الشيخ "محمود المكفّراتي"
مثلاً.. ده آية ف الأخلاق والأدب.. ده انا متابعة كل حلقاته ف قناة "المؤمنين"..
ربّنا يقوّي إيمانه.
- ها هاه ها.. الله يحظِّك ضحّكتيني.
- ضحّكتك ليه؟.. أوعى تقول لي إنه بيشرب خمره
راخر ف الحفلات بتاعتكم دي.
- الشهادة لله ما شوفتهوش بيشرب خمرة.. بس
شوفته كذا مرة وهوّ بيشيّش ف حفلات ع الضيّق كده.. وعلى فكرة الراجل ده دمّه زي العسل
ونكته تموّت م الضحك.. ده هلهلي خالص غير ما بيظهر ف الإعلام.. اسمعي النكتة دي
قالها مرّة ف قعدة كده كنت حاضرها: بيقول لِك ست رجعت بيتها بعد ما اختفت أربع
أيام.. وقالِت لجوزها إن فيه مجموعة شباب خطفوها في شقة وقعدوا يغتصبوها أسبوع
بحاله.. ولمّا جوزها قال لها: بس إنتي غايبة بقى لِك أربع أيّام بس.. قالت له: لأ
ما أنا جايّة آخد شويّة غيارات وقمصان نوم وراجعة أكمّل باقي الأسبوع.. هها ها.
- ربّنا يرحمنا برحمته.. صحيح إحنا بقينا ف
آخر زمن.. دي من علامات الساعة.
- فكّرتيني.. تبقي تصحّيني بكره بدري..
الساعة سبعة الصبح.
- بس بكره الجمعة.. أجازة م الجرنال.
- أصلي ح اروح أغطّي مؤتمر "علامات
الساعة" ف مجمّع الأديان مكان "صبحي" محرّر الصفحة الدينيّة إكمنّه
لسّه ما رجعش من عمرة المولد النبوي.
- الله!.. يعني الكلام ده صحيح بقى!
- كلام إيه؟
- إن يوم القيامة بعد عشر أيام.
- إنتي بتخرّفي بتقولي إيه؟
- هوّ انا اللي باقول.. دي الناس كلّها اللي
بتقول كده بعد ما الأمريكان قالوا ع المذنّب ده.
- مذنّب إيه يا وليّه ده؟.. وما له وما ليوم
القيامة؟
- آه.. ما انت بايت من امبارح ف الحفلة
المدعوقة دي ومش حاسس بحاجة.. الأمريكان قالوا امبارح بالليل إن فيه مذنّب ح يخبط
ف القمر يدمّره يوم عشرة عشرة الجاي.. والناس ف الفيسبوك بيقولوا إنه ح يخبط ف
الكورة الأرضيّة مش ف القمر.. وكل البني آدمين اللي على وجه الأرض ح يموتوا
والقيامة ح تقوم.
- يا سلام!.. الناس دي غاوية إشاعات وحركات
سيما.. زي ما طلّعوا قبل كده إن نهاية العالم يوم 12 / 12 / 2012.. وواحد ظريف
تاني قال إنها ح تبقى 13 /13 / 2013.. وطلع الكلام ده كلّه هجس.. الظاهر بيتفرّجوا
على الأفلام الأمريكاني بتاعة نهاية العالم.. وبعدين المؤتمر ده متحدّد ميعاده من
أربع شهور أصلاً.
- صدفة غريبة قوي.. يوه.. الكلام أخدنا
والعيال إتأخّروا على مدارسهم.
- طب ما تنسيش تعملي لي القهوة قبل ما تنزلي
وسيبيها لي على ترابيزة الصالة عقبال ما آخد دش بسرعة.