الحرفي المصري: خريج صنايع وفي الشغل ضايع
فيه مثل أمريكي بيقول: "work smarter
rather than harder" يعني "اشتغل
بذكاء أكتر ما تشتغل بمجهود" .. ليه الحرفيين في مصر ما يشتروش الآلات
الحديثة اللي ح تساعدهم في شغلهم وتوفّر لهم في المجهود والوقت؟ .. الآلات دي مش
حديثة قوي ومش غالية خالص .. مين المسؤول عن تطوير مهارات الصنايعي في مصر بدل ما
مستواه بينزل كل مادا عن الجيل اللي قبله .. ده إذا كان فيه حد عايز يبقى صنايعي
أصلاً اليومين دول .. كلّهم عايزين شغلانة مريحة وبتجيب فلوس وخلاص بغض النظر عن
قيمتها: اللي يشتغل على توك توك أو تاكسي واللي يقف على فرشة بضاعة يقلّب في عيشه
واللي يخدّم في قهوة أو كافيتيريا واللي يشتغل سمسار علشان أونطجي وبيعرف يلعب ع
الحبلين واللي يستنطع في أي شارع ويمسك فوطة صفرا ويبقى سايس .. كلها شغلانات ما
فيهاش صنعة وتخصّص وأي واحد ما عندهوش مهارة ف أي حاجة ممكن يشتغلها .. ده الواحد
بيقع مع صنايعية ما يعرفوش الألف من كوز الدرة وواخدين الصنعة بالفهلوة وبيطلبوا
أجر عالي جداً لا يتناسب مع مهارتهم وشغلهم .. حتى خريجي الصنايع طالعين من
الدبلوم "يا مولاي كما خلقتني" .. مش عارفين الألف من كوز الدرة .. علشان
التعليم الفني في المدارس الفنيّة بقى زي التعليم العام في باقي مدارس التربية
والتعليم .. مناهج قديمة ومدرسين جهلة ومدارس ما فيهاش أي إمكانيّات ونظام عقيم من
أوّله لآخره.
في البلاد المحترمة فيه مؤسسات (حكوميّة أو شبه حكوميّة) مسؤولة عن تدريب وتعليم الحرفي (وأحياناً تشغيله كمان) على الأساليب الحديث والآلات المتطوّرة والحرفي بيتخرّج بعد ما يستوفي الشروط اللازمة لإنجاز عمله وينجح في الاختبار الموّحد (على مستوى الدولة) وياخد رخصة يتم تصنيفها A و B و C حسب درجات نجاحه وعدد سنين خبرته في هذه الحرفة .. وكمان بيتم تحديد أجرته على هذا الأساس (وهذا الأجر منشور على المواقع الإلكترونيّة لهذه المؤسسات ومتاح للجميع) .. يعني ما تجيبش مثلاً واحد يغيّر حنفيّة بخمسين جنيه وممكن واحد تاني يقول لك تمانين وكل واحد وشطارته وفهلوته وتقييمه للمستوى المادي للزبون .. ولمّا تحصل مشكلة في خلال أسبوعين من العمل (يعني مثلاً الحنفية رجعت تنقّط تاني) ملزوم من الحرفي يرجع يصلّحها ببلاش وإلا ح تتقدّم فيه شكوى وتتسحب رخصته ويقعد في البيت من غير شغل ...... إحنا لسه بدري علينا قوي .. يا مهوّن هوّن.