يوماتي بافطر أمل واتعَشّى بالإحباط
يوماتي بافطَر أَمَل
واتعَشّى بالإحباط
خيبتي بتركَب جَمَل
ودَمّي ريحتُه شياط
فيه خير كتير ف البَلَد
لكِنُّه مُش للبَلَد
وإيش ياخُد ابن البَلَد
مِن مَجْلِس الظُبّاط؟!
واحشاني يا مُتْعِبة
ف الحَرب أو ف السِلْم
يا بعيدة وقريّبة
وحَبيبة قوي للعِلْم
أنا
وانتي يا طَيّبة
مَعمول علينا الفيلْم
وانا حيلتي إيه غير حِلْم
والدَعوة ف الصَلوات؟!
يوماتي بافطَر أَمَل
واتعَشّى بالإحباط
أنا ف التاريخ باتعِرِف
ماضي ومُش حاضِر (لي ماضي عريق وحاضر متواضع)
وانا ع الوَرَق باعتِرِف
ماضي ومُش حاضِر (مضيت بتوقيعي رغم عدم حضوري
فعليّاً)
ولَـمّا جيت اختِلِف
كتبوني قال: "حاضِر" (زعموا
موافقتي رغم اعتراضي)
"حاضِر" لإمتى بَقى
ده الريح ما سابش بَلاط؟!
ما تسيبوا حَبِّة فَرَح
يتسَرسِبوا فينا
نَصَبْتوا ليه الفَرَح
وفرِحْتوا ليه فينا؟!
دَم الشَهيد اتمَسَح
بَسْ الجِراح فينا
فينا مكَفّينا
فبلاش بَقى استعباط
يوماتي بافطَر أَمَل
واتعَشّى بالإحباط