عم غريب
عَم غريب واخِد الدُنيا زي ما تجيب
ولا ماسِك فيها ولا متَبّت
وتشوفه يضحَك وينَكّت
ويقول لها أمرِك دَه عجيب
يصحى يجيب العيش والجِبنة والجُرنال
واللي ف جيبه رايح كُله لسِت عيال
م الفَجريّة لنُص الليل
خَمسة وتلاتين سَنة شغّال
اللُقمَة يدوبَك بتكَفّي بطلوع الروح
والهِدمة على قَد تدفّي القَلب المجروح
وامّا تقول له إيه الأحوال
يحمِد ربّنا .. عال العال
بسيجارتُه وكوبّاية الشاي
قُدّام ماتش الأهلى الجاي
إن كِسِب الاحمر يا سُعادتُه
وإن خَسران ح يكَشّر عادتُه
وح يرجَع ف ثواني يطيب
عَم غريب ده أبويا وجِدّي
عَم غريب تسعين مِليون
الصَبْر معَلّم ف قلوبهم
مليون خَط بمليون لون
وقت الشِدّة تشوفهم سَد
ولا خافوا أبداً مِن حَد
وامّا الدُنيا تِقْسى عليهم
واقفين دايماً زي أَسَد
عَم غريب واخِد الدُنيا زي ما تجيب
ولا ماسِك فيها ولا متَبّت
وتشوفه يضحَك وينَكّت
ويقول لها أمرِك ده عجيب