الستة "ع" الشهيرة للطبيب المعاصر
وقعت تحت يدي ورقة قديمة (لم استطِع تحديد
عمرها) لأسعار الخدمات بعيادة طبيب سابق، وبالرغم من الأسعار الزهيدة جداً التي
كان يتحصّل عليها هذا الطبيب (ومَن عاصره) إلا أن اللذيذ بقى إن التلاتين قرش
(قيمة الكشف) بتوع زمان دول كانوا بيجيبوا للدكتور الخمسة "ع" الشهيرة :
ع ــيادة، ع ــربية، ع ــروسة، ع ــمارة، ع ــزبة .. إنما اليومين دول اتغيّروا
خالص وبقوا ستّة كمان:
1.
عـــــجز أو مرض
مميت: ممكن ييجي للدكتور لو اتعدى من المرضى ذوي الأمراض الخطيرة.
2.
عِـــــلة أو نقطة:
من الأسئلة الغريبة اللي تشل للمريض وأهله من عيّنة "بابا ح يخف إمتى بالظبط
يا دكتور؟" أو "هوَّ الحرنكش خطر على حالة جوزي؟" أو "طب أنا
بانهج ليه وانا طالع شقتي ف الدور الخامس مع إني لسه ما كمّلتش السبعين؟".
3.
عــــاهة
مستديمة: لو أهل المريض ضربوا الدكتور لإنه فشل في إنقاذ قريبهم ذو الثمانين
ربيعاً اللي داسته تريللا بعد ما وقع في نص الشارع من الدور العاشر.
4.
عــــبيطة: ترضى
تتجوّزه وتضيّع معاه عمرها وهو بيقعد معاها ومع ولادهم في البيت ربع ما بيقعد في
شغله وعيادته ونوبتجياته التي لا تنتهي .. ولمّا بيروّح يا بياكل يا بينام من
الهدّة والمناهدة طول اليوم مع العيانين.
5.
عــــفريت يركب أمه:
لمّا الضرايب تحاسبه ع اليافطة بتاعة العيادة والأثاث المفروشة به العيادة
والأجهزة اللي بتساعدة على تشخيص المرض ويمكن كمان ملابسه ومظهره وفي الآخر يكتشف
الطبيب إنه بيصرف على بيته نص ما بيصرف ع الضرايب والتأمينات والحي والكهربا
والميّة والنضافة ومرتبات العاملين والصنايعية اللي بياخدوا حقهم الطاق اتنين
لإنهم فاكرين إن الدكتور ده غني جداً وأهبل قوي وبيتكسف خالص.
6. عــــقدة نفسية: لمّا يكتشف إنه بيدرس ويمقق عينه في الكتب خمسة وعشرين سنة على الأقل علشان يتفوّق ويكتشف في الآخر إن دخله الشهري نُص الميكانيكي والسبّاك وتِلت أمين الشرطة ورُبع الظابط وخُمس القاضي وسُدس التاجر وسُبع امبراطور الكيميا أو وحش الفلسفة وتُمن كومبارس السيما وتُسع لاعب كورة في فريق درجة تالتة وعُشر أي غازية في كباريه البلبل الحيران.