دعوة للتظاهر فوراً: أفيقوا أيها المصريون .. إنقذوا "مصر"
إعلامنا المصري الهادف أقام الدنيا ولم
يقعدها بسبب قضية غاية في الخطورة ربما تؤثر على حاضر مصر ومستقبل شبابها: أين ذهبت لقطة الراجل اللي شايل سعاد حسني في أغنية الدنيا ربيع؟ .. مَن جرؤ على حذف هذه اللقطة التاريخيّة المهلبيّة فمسح بذلك جزءاً هاماً من ذاكرة هذه الأمّة الهيطليّة
القشطليّة مما يهددنا جميعاً بنسيان أمجادنا المحلبيّة الألماظيّة ومحو تراثنا
الفني الحضاري التليد الخالد الذي نتباهى به أمام العالم؟ .. اللقطة اللي كان
المصريين كلهم بيستنّوها (زي ما الإعلامي الأمين بيقول) م السنة للسنة علشان يحسدوا
إبن المحظوظة (على حد وصف تمّورة) اللي كان شايل نجمة الوطن "سعاد
بوسني" خصوصاً لمّا كان هذا المواطن الشريف بيبُص لها من تحت لفوق (كما أسرد
تيمو) علشان يشوف إنها بخير ويطمّن عليها أحسن تقع (وما تخلّيش خيالك القذر يسيء
الظن بالراجل وتفتكر أنه كان بيبص في هذا الاتجاه علشان يشوف حاجة تانية لا سمح
الله) .. مش كفاية مسحوا لقطة الأخ العزيز فرج (أكثر
الله من شعر صدره إن كان عايش وطيّب ثراه لو مات) مع نفس النجمة في فيلم الكرنك.
في اعتقادي أنها مؤامرة من القوى الرجعية المتأسلمة المتخلّفة على شعب كامل تستحق أن نلتفت لها بمنتهى الاهتمام ونتصدى لها ونقاومها بكل ما أوتينا من قوّة .. ومش بعيد لو سكتنا المرة دي يعملوا فينا أكتر من كده بحجة الأخلاق والعياذ بالله .. مش بعيد أبداً المرة الجاية يتمادوا أكتر ويمسحوا تلك البوسة الخالدة التي منحها حسين فهمي (ربنا يدي له الصحة ويبارك له في شفايفه) لزوزو (الله يرحمها ويبشبش الطوبة اللي تحت شفايفها برضه) .. يا نهار اسود .. دول عايزين يدمّروا الأجيال القادمة لشبابنا كله .. مش لازم نسكت على هذه الهجمة الهمجيّة البربريّة التي تهدف للنيْل من حريّة التعبير الفني في مصر .. مش لازم نكون أقل وطنيّة من إعلامنا اللي دايماً بيسلّط الضوء على أهم قضايا الأمّة المصيريّة .. لازم نتحرّك ونكون على مستوى الحدث ونجتمع على قلب رجلٍ واحد وندافع عن حريتنا ونفوق من غفلتنا بقى وننقذ أغنية الدنيا ربيع (أكيد قصدهم الربيع العربي) من هذا العبث والتخريب .. لازم نقوم بمظاهرات حاشدة احتجاجاً على محاولات طمس الهويّة المصرية الأصيلة .. لازم كلنا ننزل الشوارع الجمعة الجايّة اللي ح نسمّيها "جمعة القصب" (إن شاء الله ح نوزّع على كل متظاهر وطني كيس قصب بشفّاطة علشان يطرّي على قلبه) .. أنا بادعو جميع المصريين المناضلين للتجمّع في أوّل شارع الهرم وبالتحديد أمام كباريه الأريزونا لعمل مسيرة من هناك حتى مدينة الإنتاج الإعلامي مروراً بشارع محمد علي ونهايةً بشارع كلوت بك.