طيّب .. يا صبر طيّب
زمان وكان يا ما كان
كان الزمان إنسان
دلوقتي ليه يا زمان
مابقِتش زي زمان
طيّب .. يا صبر طيّب
***
يرحم زمان وليالي زمان
والناس يا مِتهنّي يا فرحان
الدنيا كانت وردة وشمعة
ولسّه ما اخترعوش أحزان
ساعات ألِف أزِف عرايس
وساعات أدور مع نور عِرسان
وياما كان بيجيني مزاج
ألسوَع العُزال كُرباج
ولما أقول: "شي" ..
الزَفّة تمشي
ولما أقول" "هِس" ..
كُلّه سمع هُس
ودُقّي يا مزّيكا
***
صدّقني يا صاحبي
كان الزمان صاحبي
أيام ما كان إنسان
طيّب .. يا صبر طيّب
***
صدّقني يا صاحبي صدّقني
طول عمري كان ولا شيء يسبقني
دلوقتي بقى حِتّة "مرسيدس"
تِسبقني وتعفّر على دَقني
طيّب .. يا صبر طيّب
***
آه يا زمان العِبر
سوق الحلاوة جَبَر
إحنا اللي كانوا الحبايب
بيسافروا بينا القَمَر
بقينا انتيكه
دُقّي يا مزّيكا
والدُنيا فابريكا
بتفرُم الإنسان
قصدي .. اللي كان إنسان
طيّب .. يا صبر طيّب