لا شيء مستحيل
وانت بتتفرج ع الفيديو ده حاول تتخلّص من الشعور بالحقد وأحاسيس الغيرة ومشاعر الحسد .. خلّي نيّتك صافية ولازم تؤمن إن السعادة ليست في المال .. ربما تكون السعادة في النقود .. ولكن الأكيد إن السعادة دايماً في الفلوس.
طبعاً "دبي" مدينة مش بطّالة .. يعني ماشي الحال .. فيه ناس كتير منبهرة بيها .. بس للأسف الناس دول غلابة على قد حالهم .. ما سافروش برّه كتير وما شافوش الدنيا أصلاً .. إسألني أنا يا إكسلانص .. بلا فخر وبلا فشخرة فأنا سفرياتي لا تنقطع حول العالم كله .. تلاقيني امبارح كنت في "كفر الدوّار" .. النهار ده في "رشيد" .. بكره في "عزبة الصفيح" .. على ودنه .. ما باونّش .. أصل السياحة في دمي يا مون بيه .. وأبعد مكان رحته كان "محلّة مرحوم" ف "طنطا" .. لا تقول لي بقى "دبي" ولا غيرها .. أقول لك إيه ولّا إيه عن "محلّة مرحوم" .. مكان خرافي مليان جِلّة للركب .. روايح بتهفهف عليك طول ما انت ماشي .. ده غير المجسمات الفنيّة التشكيليّة المصنوعة من الزبالة .. فظيعة مريعة شنيعة .. ويا سلام بقى لو بتتمشّى على ضفاف المصرف ح تشوف اللي عمر أهلك ما شافوه .. كفاية بس الحمير والقطط والكلاب الميّتة المرميّة هناك .. منتهى النتانة .. وعندهم مشبّك فظيع .. بخلاف حَب العزيز طبعاً .. ولو عايز تعمل شوبينج عليك وعلى سوق الجمعة .. اللِبس هناك أشكال وألوان: إشي عبايات وإشي ترينكات وإشي بروفرات وإشي شباشب ومنتوفليات .. طبعاً ما عندهمش أوض بروفات ولو عايز تقيس منطلون مثلاً إدّارى ورا أي ملاية وقيسه ف الطل ولا مؤاخظة .. ولو عايز بقى تهادي مراتك اكسسوارات بلاستيك ألوان استنّى سوق الغجر يوم الحد .. مش ح اقدر اوصف لك كل حاجة يا مون شيري .. ضروري تروح هناك وتشوف بنفسك.
ممكن تاخد ميكروباظ من موْقَف "المرشحة" بتاع "سبرباي" اللي ف "طنطا" .. وانزل على أوّل السكّة الزراعيّة ح تلاقي هناك تكاتِك بالهبل فشر العربيّات "اللامبورجيني" بتاعة "دبي" دي .. كفاية انها مفتوحة من كل حتة وبتجيب طراوة .. بس قول للوله السوّاق يا واش يا واش أحسن يقلبك ف الترعة ...... رحلة سعيدة يا إكسلانص بانص.