أمثال صعيدية عبقرية مهجورة | خلاصة الحكمة والخبرة

كيف تصبح مليونيراً بعد التخرج بشهور

 

 

أحب أن أتقدّم إلى أبنائي الشباب حديثي التخرّج في كليّة الطب (ومنهم إبني "باسم") بهذه النصائح البغيضة (ولكنها واقعيّة في وطننا المنكوب والتي أرجو ألّا يتّبعوها) من أجل أن يصيروا مليونيرات أغنياءً في فترةٍ وجيزة، وقد استبعدت النصائح الأخرى المثاليّة (ولكنها خياليّة في مصر المهروسة والتي أرجو أن يحتذوها) حتى لا يندموا ويصيروا مديونيرات (زي حالاتي)، ولذلك فلن أقول لكم – يا أعزّائي – أنه يجب عليكم أن تنهلوا من معين الأخلاق وتغترفوا من ينبوع الاجتهاد وتعِبّوا من نهر الصبر وترتشفوا من بحر العمل وتتجرّعوا من محيط العِلم فتلك المواعظ والعِبَر لن تُفضي بكم إلّا إلى مستنقع الكُفر بالوطن وبكل ما آمنتم به من قبل.

دعوني أتكلّم بصراحةٍ وصدق وأقدّم لكم تلك الإرشادات الصادقة بصفتي أوّلاً صادق "ابن أبي صادق" ولأنني ثانياً طبيب منذ 32 عاماً وحيث أني ثالثاً مصري من زمان (لغاية ما طلع بوزي) وقد مررت بعددٍ غير محدود من التجارب والصدمات والفقعات في وطننا التعس التاعس التعيس المتعوس والتي تركت آثارها العميقة على بعض تفكيري وأغلب تصرّفاتي وكامل قفاي الحمول (مع بعض الآثار المستترة الأخرى التي أدّت لانفجار مرارتي وأجزاء أخرى أستحي أن أذكرها)، واسمحوا لي أن أستعرض لكم عدّة طرق يمكنكم أن تسلكوها (غير طريق الهجرة للخارج والطفشان برّه علشان تقصّروا وتجيبوا م الآخِر) في مصرنا المفروسة أم الدنيا ومرات أبونا:

·      بعد ما تتخرّج على طول ويادوبك تاخد ترخيص مزاولة المهنة وقبل ما تاخد أي دراسات عُليا ولا كلام فارغ من ده إتصرّف ف قرشين كويّسين (إن شا الله تستلفهم) وافتح عيادة فاخرة في مكان راقي وعلّق عليها يافطة إنك أستاذ دكتور واخد شهادات كتيرة من برّه ومساعد لأكبر دكاتره في العالم .. وعشان تسبك الحكاية إعمل قناة طبيّة ع اليوتيوب وقول فيها اللي نِفسك فيه ولِف ع القنوات الفضائيّة إدّيهم قرشين علشان يستضيفوك ويقولوا عنّك اللي انت عايزه وسُمعتك تكبر أكتر واكتر .. ولازم تخلّي كشفك غالي جداً (ألفين أو تلات آلاف جنيه مثلاً) علشان الناس تصدّق الهالة اللي انت رسمتها حواليك وح تلاقيهم يتلمّوا عليك زي الدِبّان .. إوعى تعطف ع الناس وترخّص الكشف علشان ما ترخّصش نفسك .. آديك شفت طبيب الغلابة اللي كان بيحن ع الناس كان شكله عامل إزّاي ولابِس إيه وساكِن فين .. ده ما كانش لاقي ياكل وما حدّش حَس بيه إلّا قبل ما يموت بسنتين تلاتة وبعد ما عمره راح هدر أمام الإهمال والإقصاء .. ولو النقابة قفشتِك أو وزارة الصحة قفلت لك العيادة مش مهم .. ح يكون عدّى عليك تلات أربع سنين لمّيت فيهم الملايين.

·      تقدر تتواصل مع شبكات زرع الأعضاء وتحاول تورّد لهم كلاوي كاملة أو أجزاء من الرئة والكبد والبنكرياس اللي ح تسرقها من أي عيّان ح تفتح بطنه علشان تعمل له أي عمليّة إن شا الله الزايدة .. شوف سعر العضو بقى بكام النهار ده .. وعقبال ما يمسكوك (ده إذا مسكوك أصلاً) ح تكون عملت لك كام مليون كده على قد ما قُسِم.

·   ممكن كمان تتخصّص في إجراء العمليّات الجراحيّة غير القانونيّة زي طهارة البنات والإجهاض وترقيع غشاء البكارة وغيرها .. العمليّات دي سوقها ماشي قوي وفلوسها كتير جداً وما عليهاش أي رقابة .. يعني ف كام شهر ح تجيب ملايين.

·      إسعى عشان تمسك عُهدة المشتروات في أي مستشفى عام .. ومش ح اقول لك بقى تقدر تخنصر إزاي وتلبّس عِمّة ده لده وتتاجر في المستلزمات والأدوية والكيماويّات لحسابك زي ما انت عايز .. بس أهم حاجة تكون دفاترك متسدّدة وفواتيرك نضيفة وورقك سليم علشان ما حدّش ينخرب وراك والنيابة تعكشك .. وبالطريقة دي ح تكسب الملايين.

·      ليه ما تفكّرش تفتح مستشفى (ولو صغيّر) لعلاج الإدمان؟ .. ساعتها ح يبقى من حقّك تصرف كميّات من الأدوية المخدّرة (المخدرات) من وزارة الصحة لاستخدامها في علاج أعراض الانسحاب اللي بتحصل للمدمنين لمّا يبطّلوا .. إنت بقى ح تصرفها وتبيعها لحسابك بمنتهى السهولة خصوصاً إن المدمنين ح ييجوا لحد عندك بدون ما يثيروا أي شبهات .. وممكن كمان تشتري مخدرات تانية من أي تاجر جملة كبير وتبيعها قطّاعي بنفس الطريقة .. يعني في الحالة دي معاليك ح تبقى ديلر قانوني وتلهط الملايين. 

·      إصرف كل اللي حيلتك ورشّح نفسك ف مجلس الشعب (ويغور الطب من أساسه) .. وما فيش داعي أقول لك ح تعمل إيه لمّا تنجح .. إنت بس تنجح وتترستق تحت القبّة وح تلاقي المصالح اللي بملايين جايّة لحد عندك بتزحف تحت رجليك .. أومّال همَّ بيموّتوا نفسهم ليه ويصرفوا الملايين دي كلها علشان يدخلوا المجلس؟ .. وقتها مش ح تلاحق ع الملايين.

·      إعمل أي تركيبات من أي أعشاب لأي أمراض ونُط ف كِرش الناس مباشرةً بدون استئذان .. إطلع لهم ف التليفزيون والراديو واليوتيوب والفيسبووك أو ان شا الله البوتاجاز والسخّان .. خلّيهم يفتحوا الثلّاجة يلاقوك قاعد على رف البيض .. يولّعوا النور يلاقوك مربّع ع النجفة .. ييجوا يجيبوا شوكة من درج المعالق يفاجأوا بيك مريّح بين السكاكين .. يفتحوا برطمان السكّر يلاقوك حاطط فيه كركمين .. ييجوا يرفعوا قاعدة الكبانيه تنط لهم م الشطّافة .. ما ترحمهمش .. وما تنساش تقول الفوايد العجيبة لتركيبتك العبقريّة اللي بتعالج البرد والزكام والكحة والسخونيّة والكسل والصداع والترجيع والمغص والضعف الجنسي والعقم وبتقضي ع الأرق وتساعد على النوم وف نفس الوقت بتنشّط وتصحصح (حسب نيّة المريض في استخدامها) وبتعالج الإمساك وفي نفس الوقت مليّنة (كده تطفي وكده تنوّر) .. وما يهمّكش لو أعداء النجاح أجبروا السٌلطات إنها تقبض عليك لإنك ح تكون عملت الملايين خلاص.

·      إنضم لأي حزب واصل (يعني حزب معرّض مش معارض) وطبّل كتير كتير لغاية ما توصل لمنصب قيادي في الوزارة .. ساعتها كل الخيوط ح تبقى ف إيدك وح تلاقي نفسك إتنطّقت بسرعة وجبت فيلّا بحمام سباحة ف أحسن حِتّة واشتريت عربيّة غالية أحدث موديل واتجوّزت بنت زي القمر من عِلية القوْم وعملت فرح أسطوري حضرته النخبة وحطّيت ف رصيدك الملايين .. وزغردي يا اللي انتي مش غرمانة.