رقصة الكلب
الشاعِر اللي شَحَت
ع العَضْم جِلْد
وشَغَت
شَمَت المَلِك فيه
شَمَت فيّا أنا .. جزّار
على بقّال
زاد ف المقام عنّي
وذُل السؤال
ولَطَم خدودُه وبَك
دَمُّه وقال:
و"كَمْ ذا
بمِصرَ من المُضحِكاتِ
ولكنّه ضَحِكٌ
كالبُكا"
كالبُكا .. كالبُكا
أنا كالبُكا .. كَلْب
أنا قافية القَلْب
دَمّي انحَلَب حَلْب
مِن فَرْط حِنيّتي
فَرّط ف حُريّتي
الديب عَوَى
وانا هَوْهَوَة
تبكّي الهوا
ولا تجيب ديّتي
أبّوح يا أبّوح يا
أبّوح
كَلْب العَرَب
مَدْبوح
وامُّه عليه بتنوح
بِنْت القَبيلة .. عَنْد
رأس كُليب
شَقِّت عليه الجيب
مات لم يصيبُه الشيب
يا ابو قَلْب لِسّه
قُليب
القَلْب قول: "آه"
.. رَبِّنا يخلّيه
راح نِعْرِضُه؟ ..
آه ولّا ح نخبّيه؟
نرقُص عليه؟ .. آه
ولّا نرقُص بيه؟
خَلّيها رَقصة
مُحْسِنة
فَرحانة لكِن مُحزِنة
ف ابن اليَتيمة
جِنسِنا .. يا جِنسِنا
يا اللي شتيمة في
جميع الألسِنة
آدي رَقصِتي .. آدي
رَقْصِنا
آه يا حياة ..
لَطَّفي
هاتي الدفوف ..
صقّفي
واتمايلي واتعَطَّفي
يا عالمة بتخَرّفي
يا جاهلة وبتِعْرَفي
ح اتزَقَّل ..
إتلَقَّفي
صاحِب مزاج فَلْسَفي
فَرَحي ضَعيف .. لأ
عَفي
حُزني خَفيف .. لأ
خَفي
ما ادري الأمانة
أمان؟
ولّا المخَبّي يبان؟
ولّا الشُجاع
الجَبان؟
ما أشجَعي وأخوَفي
أنا خِل .. ضِل وَفي
ف الخير وَفي
وفي الشَر برضَك وَفي
ودي حاجة تِخْجِل؟
.. لأ
وده كَلْب يحجِل؟ ..
آه
ودَه فيه حاجات
قَلْقاه
قالِت الهموم:
"ألقاه"
في كل يوم قال:
"آه"
ودي حاجة تِخْجِل؟
.. لأ
ودَه كَلْب يحجِل؟
.. آه
آه .. أي نَعَم أي نَعَم
آه .. يا ندامة
ونَدَم
قالوا التكالُب
نَهَم
أنا ما فهِمْتِش آه
غير الآهات والنَغَم
عَصْعوصي فَك وديلي
متْلَحْلَح
زَيْ الفطيرة قَلْبي
يترَحْرَح
واللي تعُضَّك
عُضّها وصَحْصَح
واصْرُخ على
الأوْضاع ..
يا مين يصَحَّح؟
وان عاد حَبيب أوْ
ضاع
لازِم توَحْوَح
أوْ تبَحْبَح
صوتي ينْبَحْ
صوتي ينْبَحّ
ديلي يرقُص
رَقصِتُه دَح
آه يا نَشْوَى ..
وآه يا نَشوَة
الأمانة والوَفا رَشوَة
ولّا إيه يا عَضْم
يا عَشوَة؟
في سَبيلها باندِبِح
دَبْح
صوتي ينْبَحْ
صوتي ينْبَحّ
ديلي يرقُص
رَقصِتُه دَح
في سَبيلها شَرْبِة
المَيّة
في سَبيلها لبِسْت ف
الخَيّة
ولّا إيه يا خَيْ يا
خَيّة؟
يا اللي عارفين
الغَلَط صَح
صوتي ينْبَحْ
صوتي ينْبَحّ
ديلي يرقُص
رَقصِتُه دَح
يا اللي داوى لساني
تسريحتِك
ريقي ما بيخلَصش مِن
ريحتِك
يا اللي دايْماً
حُرَّة بدرِعْتِك
تِطْلُقيني ف
البَلَد رَمْح
صوتي ينْبَحْ
صوتي ينْبَحّ
ديلي يرقُص
رَقصِتُه دَح
ليه دَكَر رايح على
نتاية؟
يا جَمَل يتّاوى ف التاية
(كلمة سودانيّة تعني المكان الذي يأوى إليه المسافرون وركائبهم وأمتعتهم)
هيّا فيها سِر
وحكاية؟
ولّا وِسْواس
الشيطان لَح؟
صوتي ينْبَحْ
صوتي ينْبَحّ
ديلي يرقُص
رَقصِتُه دَح
دي اللي فيها الصَعْب
والهَيّن
واللي واللي ..
ليّنة ولَيّن
بالنهار تغْمَق وتبَيّن
في الليالي لونها
يفتَحّ
صوتي ينْبَحْ
صوتي ينْبَحّ
ديلي يرقُص
رَقصِتُه دَح
أنسِحِب مِن ديلي
أوْ أجري
واتحِرِم يا دُنيا
من أجري
السَواقي بتِنعي مِن
بَدري
يا اللي بتقولوا:
"الأمل شَح"
صوتي ينْبَحْ
صوتي ينْبَحّ
ديلي يرقُص
رَقصِتُه دَح
شَمْس يا اللي
مشَمّسة وغايمة
عيني نايمة
وعيني مُش نايمة
طولي ساح في رَقدِتي
الناعمة
زَيْ لَمّا يسبَح البَح
(كلمة ريفيّة بمعنى البَط)
صوتي ينْبَحْ
صوتي ينْبَحّ
ديلي يرقُص
رَقصِتُه دَح
فَرحانة لكن
مُحْزِنة
مَطْلوقة زَيْ
مزَنزِنة
هِنا من هِنا
وهِنا مِن هِنا
وانا جيت هِنا
وانا كُنت تَوّي
هناك
قال ابن آدم:
"إحنا تَوّهناك"
أنا قُلْت: "عُمري
ما اتوه وعُمري ما اضِل"
أنا قُلْت:
"أصلي ضِل ..
ضِل هَنَاك ..
لاهِث ولاحِس ..
وارحَموني يا بشر
لاحسَن ..
أنا ما انتَهيت مِن
كَفّكُم لَحْساً
ولا خُفت نِفسي تموع
..
ورَقَصت للمَجْموع
..
مَسْموع ومُش
مَسْموع ..
ودموعي مِن غير دموع
..
والقَلْب ..
قافية وكافية كَلْب"