شُقَع بُقَع يا ديل الفار
أنا الأديب ولا تعرفنيش
تِقرا لي لكن ما تشوفنيش
أنا الأديب ولا تعرفنيش
تِقرا لي لكن ما تشوفنيش
كلامي لا هو مَدهون وَرنيش
ولا المعاني عليها غُبار
شُقَع بُقَع يا ديل الفار
يا شَعب "مصر" يا خُم النوم
ما تفوق بقي وتشوف لك يوم
يا شَعب "مصر" يا خُم النوم
ما تفوق بقي وتشوف لك يوم
دي الثورة قامِت ف "الخَرطوم"
وانتَ اللي نايم ليل بنهار
شُقَع بُقَع يا ديل الفار
يا شَعب ثور داهية تسِمَّك
وشيل أصول أسباب غَمَّك
يا شَعب ثور داهية تسِمَّك
وشيل أصول أسباب غَمَّك
عصابة بتمُص ف دَمَّك
والإسم قال ظُبّاط أحرار
شُقَع بُقَع يا ديل الفار
شيلوا القَطيع النَكساوي
اللي لا عايز ولا ناوي
شيلوا الرئيس النَكساوي
اللي لا عايز ولا ناوي
يرحَل ويكفانا بلاوي
من تحت راسُه ذُل وعار
شُقَع بُقَع يا ديل الفار
أخدوا اليهود "غَزَّة" و"سينا"
وبُكرة يبقوا وِسطينا
أخدوا اليهود "غَزَّة" و"سينا"
وبُكرة يبقوا وِسطينا
والراديوهات بتغدّينا
خُطَب ونتعشّي أشعار
شُقَع بُقَع يا ديل الفار
الشيخ "إمام" قال كِلْمِة حَق
جَت الحكومة قالت له: لأ
الشيخ "إمام" قال كِلْمِة حَق
جَت المباحِث قالت: لأ
وابو النجوم علي وِدنه انزَق
ف المُعتَقَل والدنيا نهار
شُقَع بُقَع يا ديل الفار
شُقَع بُقَع يا ديل الفار