أهلاً يا دوج ـــتور
زميلي الطبيب الذي جعلوك طبيباً: إمسك
أعصابك وانت بتقرا الجواب اللي في الصورة المرفقة للبوست ده .. ها .. قريته؟
لو الصورة وِحشة ومش عارف تقرا أنا ح اقول لك
فيه إيه: الجواب ده يا سيدي مبعوت في 20/12/2016 من مدير إدارة "شرطة سياحة
وآثار الجيزة" إلى الأمين العام لـ"هيئة الآثار" بخصوص اعتماد 684
ألف جنيه سنوياً لعدد (اسم الله على مقام اخويا) 6 كلاب بواقع 9 آلاف جنيه شهرياً
لكل كلب قيمة تكلفتهم.
طبعاً الجواب ده من خَمَس سنين يعني زمان
تكلفة الكلب ده الوقت بقت 12 آلاف جنيه شهريّاً على الأقل (ده كمان لو بطّل ياكل
لحمة بلدي أم 170 جنيه وكانت نِفسه حلوة ووافق ياكل لحمة القوات المسلّحة وارد
"السودان" المدعومة أم 100 جنيه) .. وما تنساش إن تكلفة الكلاب دي
مقتصرة على الأكل والشرب والعلاج والسكن بس .. إنما البني آدمين المصريين (اسم
الله على مقام اخويا برضه) بيتكلّفوا فوق كده كِسوة ومواصلات وتكاليف جواز وتأثيث
سكن وتعليم وفواتير كهربا وميّه وغاز وضرايب وفُسح ونثريّات وتبرعات لصندوق
"تحيا مصر" (ولّا انت البعيد خاين وعميل وما بتصبّحش على
"مسر" يا وِحِش) .. علماً بأنني عندما استقلت من "وزارة
الصحّة" في 1998 كان مرتبي الإجمالي الشهري 128 (مائة ثمانية وعشرين) جنيه من
"مستشفى رمد دمنهور" (شاملة 190 قرش إعانة زواج لمّا كمّلت نُص ديني)
رغم إقامتي بالأسكندرية ودراستي للماجستير في "جامعة طنطا" .. علشان كده
قرّرت أرجع الشغل في "وزارة الصحّة" تاني يمكن ربنا يكرمني ويعاملوني
معاملة الكلاب .. بس اسمح لي أبعت جواب (على غرار الجواب المرفق بالظبط) لوزير
الصحّة علشان أضمن حقي الأوّل:
السيّد الدكتور: وزير الصحّة
والسكّان:
تحيّة طيّبة .... وبعد
نظراً للظروف الراهنة التي تمر بها البلاد
ولأهميّة الحفاظ على صحّة المواطنين وضرورة وجود أطباء مدرّبين جيّداً وذوي خبرة
وكفاءة للكشف على المرضى وإجراء الجراحات اللازمة لهم (دون أن يسرقوا كلاويهم
وأكبادهم) وتعقيم الأدوات الطبيّة .. أتشرّف بأن أرسل لسيادتكم طيّه إجمالي
المبالغ المطلوب توفيرها حيث تمّت مخاطبة "الإدارة العامّة لشئون
الأطباء" والتي أفادت بأن تكلفة الطبيب الواحد شاكب راكب ستة آلاف جنيه في
الشهر (مما يمثّل راتب النصف الفوقاني أو التحتاني لأي كلب ابن كلب) والمطلوب
يوميّاً 6 أطباء بلدي أو بوكسر أو حتى لوولوو للمستشفى بواقع 36 ألف جنيه شهرياً
قيمة تكلفتهم بخلاف الكمامات والأطواق .. لذا نفيد سيادتكم علماً بأن المبالغ
المطلوب اعتمادها هي : مبلغ 36 ألف جنيه شهرياً أو مبلغ 432 ألف جنيه سنويّاً.
برجاء من سيادتكم التكرّم بالإفادة بالاعتماد
المالي حتى يتسنى لنا القيام بالتعاقد مع هؤلاء الأطباء المدرَّبين علماً بأن 4
منهم أبيض ف اسود و2 هافان وجميعهم على استعداد تام للتزاوج فوراً وإهداء الوزارة
ما ينتج من وِلدة.