أمثال صعيدية عبقرية مهجورة | خلاصة الحكمة والخبرة

بلدي وحبيبتي

 

 

الغَرام ف الدَم سارِح

والهَوى طارِح معَزّة

والحَنين للقُرب بارِح

والنَوى جارِح يا عَزّة

 

يا ابتسامِة فَجْر هَلِّت

بَدِّدِت ليلي الحَزين

يا نَدى الصُبح اللى سَأسَأ

فوق خُدودي الدَبلانين

بَل شوقهُم

صَحّي لون الوَرد فوقهُم

كُل خَد وشَاملُه وَرْدَة

مين يدوقهُم

غيرِك انتي

ومين سِواكي

يا حَياتي .. يا مَلاكي

يا نَسيم الحُب لمّا هَبّ

هَز القَلْب هَزّة

يا هَوى الأحْلام يا عَزّة

 

الليلَة دي جُم خَدونى يا مَلاكي

جوز تَنابلة ونُص دَسْتَة من التيران

كُنت باحْلَم يا حَبيبتي

كُنت باحْلَم بيكي إنتي

كُنا قال أنا وانتي

قال ف جنينَة خَضْرا

ومحاوِطها البُرْتُقان والسَيْسَبان

وانتي جوّه قُرُنفِلاية

بالعَبير بتستحَمّي

أجْري يَمِّك يا هَوايا

تِسبَقينى وتجري يَمّي

أَحْضُنِك واشرَب عبيرِك

مِن شَفايفِك

والغُصون

واقفَة شايفَة

بتراعينا بَس خايفَة

م العيون

والعيون بتقول كَلام

والكَلام طاير حَمام

بينادينا بالأغاني

ويهادينا بالسَلام

 

كُنت باحْلَم يا حَبيببتي

كُنت باحْلَم بيكي إنتي

أيْوَه إنتي

ومين سِواكي

يا حَياتي .. يا مَلاكي

يا نَسيم الحُب لمّا هَب

هَز القَلْب هَزّة

يا هَوى الأحْلام يا عَزّة

 

وانطَلَق ف الجَوْ فَجْأة

يا حَبيبتي صوت مُفاجأة

صوت يخَلّي الدَم يجْمَد :

إصْحَى يا احمَد

إصْحَى يا احمَد

وانتَهى الحِلْم الجَميل

وابتدا الهَم التِقيل

 

..... : فين إمام؟

..... : إنتوا (إنتم) مين؟

..... : إحنا ناس مُكَلّفين

تيجي سالِك مِش ح تِتْعَب

واحنا طَبْعاً مَعذورين

..... : إنتوا دود الأَرْض

والآفَة المُخيفَة

إنتوا ذَرِّة رَمْل

ف عيون الخَليفَة

إنتوا كُرباج المَظالِم والمآسي

إنتوا عِلّة ف جِسْم بَلَدي

إنتوا جيفَة

..... : سَكِّتوه ابن الكِلاب

سَفِّفوه من التُراب

فَتِّشوا كُل الأماكِن

طَلّعوا رُفوف الدولاب

 

كَـمِّموني يا حَبييبتي

كَتـِّفوني يا حَبيبتي

قَوّموني .. قَعَّدوني

كُل شَعْرَة ف جِسْمي

بالعين فَتِّشوها

المخَدّة مِن جِنانهُم شَرّحوها

وانتَهي التَفتيش

ما فيش

صَدَّقيني ما تخافيش

هوَّ فيه يا عَزّة عندي مَمنوعات

غير باحِب الناس

وباكْرَه السُكات

بَص واحِد م التَنابلة

جُوّا عيني

وانتي عارفَة

عنيّا صافية وطَيّبين

زَيْ كُل عيون بَلَدنا يا حَبيبتي

شِبّاكين ع القَلْب دوغري موصّلين

كان مُناه يلمَح عَلامِة خوف بسيطَة

طب ح ييجي الخوف مِنين

ابن العبيطة

هوَّ مين فينا الجَبان

ولّا مين فينا اللى خان

اللى قَلْبًه بالمَحَبّة وبالأماني

وبالربيع الاخضر مزَهَّر والأغاني

ولّا كَلْب الصيد وأَسيادُه الأباطرَة؟

أكّالين لَحْم البَشَر فوق الصَواني

هوَّ مين فينا الجَبان؟

ولا مين فينا اللى خان؟

 

هوَّ بَص ف عينى بَصَّة

ارتَجف وف حَلْقُه غَصَّة

واتعوَج ومال وقال

جُملِتين مِش مَفهومين

أصله شاف صورتين جُمال

ف العيون الطَيّبين

"مصر" .. ف العين الشِمال

وانتي .. ف العين اليمين

 

 

أحمد فؤاد نجم