عن موضوع الفول واللحمة
عن موضوع الفول واللحمة
صرّح مصدر قال مسئول
إن الطب اتقدم جداً
والدكتور "محسن" بيقول
إن الشعب المصري خصوصاً
من مصلحته يقرقَش فول
حيث الفول المصري عموماً
يجعل من بني آدم غول
فالبروتين الكامن طيّه
نادر زيّه ف أيُّها فول
تاكل فخدة في رُبع زكيبه
والدكتور "محسن" مسئول
يديك طاقة وقوّة عجيبة
تِسْمَن جداً تِبقى مهول
لحمة نباتي ولا ف الحاتي
تاكل قِدرة تعيش مسطول
ثم أضاف الدكتور "محسن"
إن اللحمة دي سِم أكيد
بتزوّد أوجاع المعدة
وتعوّد على طولة الإيد
وتنيّم بني آدم أكتر
وتفرقَع منه المواعيد
واللي بياكلوا اللحمة عموماً
ح يخشّوا جهنم تأبيد
يا دكتور "محسن" يا مزقلَط
يا مصدر يا غير مسئول
حيث إن انتوا عقول العالم
والعالم محتاج لعقول
ما رأى جنابك وجنابهم
فيه واحد مجنون بيقول
إحنا سيبونا نموت باللحمة
وانتوا تعيشوا وتاكلوا الفول
ما رأيك ياكابتن "محسن"؟
مش بالذمّة كلام معقول