معركة بين اللحمة والفول
اتلم يا مدمّس
شايفاك كده على طول
فرحان ومتحمّس
على إيه عايش لي الدور
يا ابو طينة ومسوّس
الفول قوام قال لها
بسوس وليَّ الفخر
أكل الغلابة أنا
شاهد عليَّ الدهر
مشهور ويكفيني
وِسط البشر سُمعة
بطحينة تلاقيني
أو حتى بالدمعة
يعرفني جيل ورا جيل
م الروضة للجامعة
أمّا انتي يا معفنة
للشهرة محدودة
على خشبة الجزار
أهي سلعة معروضة
غالية صحيح التمن
ح يجور عليكي الزمن
ما ح تبقي موجودة
اللحمة قالت هاهأ
ده قُصر ديل يا ازعر
إشهد وقول الحق
على إيه ح تتكبّر
دا انا يابني من صغري
وانا أكلة الباشوات
ولا يعمل البوفتيك
غير لحمي انا بالذات
والفتّة من غيري
تشبع صوات وعياط
ولا حد مني يمل
ولا حد غيري يحل
ف الكوسة بالبشاميل
والكبسة ما لهاش حل
باللحمة والبهارات
إصحى وفوق يا خفيف
يا ابو نفس أمّارة
آخرك يا حلو رغيف
ويغمّسوه بصارة
فبعَظَمِة الأبطال
قام حط رجل ف رجل
وبعلو صوت قام قال
شوفي يا حتة عجل
سيبيكي م الفشخرة
وكفاية هري كتير
يا واخدة ع المنظرة
والكدب والتبرير
دا انتي يا موكوسة
خلطوكي لحم حمير
ناسية جنون البقر
من كام سنة فاتوا ؟!
واللي اتأذوا م البشر
ومن المرض ماتوا ؟
أقول كمان وافضحِك
ولّا تلمّي الدور ؟
انا كان ضميري انصحِك
ما اقصدش ألف وادور
ح تلمّي نفسِك بقى
ولا اكشف المستوووور ؟
ضحكت له ضحكة خوف
وقالت له ما تفكّك
إعمل يا فول معروف
دا انا برضه زي اختك
وكلامي كلّه هزار
صدّقني وباناغشك
دخل الشيطان وِسطنا
والمشكلة كبرت
إنت الكبير إنما ...
أنا عيّلة وغلطت.