يا أهل "مصر" المحميّة بالحراميّة
الحمد لله خَبّطنا
تحت بَطاطنا
يا مَحلا رَجعِة ظُبّاطنا
مِن خَط النار
يا أهل "مَصْر" المحميّة
بالحَراميّة
الفول كتير والطَعميّة
والبَر عَمار
والعيشة مَعْدَن واهي ماشية
آخِر أشيا
مادام جَنابُه والحاشية
بكروش وكتار
ح تقول لي "سينا" وما سيناشي
ما تدوِشناشي
ما سُتمّيت أوتوبيس ماشي
شاحنين أنفار
إيه يعني لمّا يموت مِليون
أو كُل الكون
العُمْر أصلاً مش مَضْمون
والناس أعمار
الحمد لله واهي ظاطِت
والبيه حاطِط
ف كُل حِتّة
مُدير ظابِط
وإن شا الله حمار
إيه يعني ف "العَقَبة" جرينا
ولا ف "سينا"
هي الهَزيمة تنَسّينا
إنّنا أحرار؟
إيه يعني شَعب ف ليل ذُلّه
ضايع كُلّه
دا كفاية بَسْ امّا تقول لُه
إحنا الثُوّار
الحمد لله ولا حَوْلَ
"مَصْر" الدَوْلة
غَرقانة ف الكِدب علاوْلَه
والشَعْب احتار
وكفاية أسيادنا البُعَدا
عايشين سُعَدا
بفَضْل ناس تِملا المِعْدة
وتقول أشعار
أشعار تـمَـجِّد وتماين
حَتّى الخاين
وان شا الله يخربها مَداين
عبد الجبّار