أكتوبر 2017 :
سيبكم من الكلام اللي مكتوب في الصورة اللي فوق دي لإنه صادر من إنسان حقود موْتور لا يقدّر فرحة مصر بحجم الانجاز الهائل الذي تحقّق .. أنا عاوزكم في موضوع تاني خالص .. بصراحة كده أنا أعدت التفكير في قيمة مكافأة كل لاعب شارك في وصول مصر لكاس العالم ولقيت إنها عيبة وعرّة وقِلّة قيمة .. يعملوا إيه المليون ونص للاعبين محترفين بيقبضوا الملايين بالدولار والجنيه الاسترليني .. دول ما يجيبوش حتة شاليه معفّن في مراسي ولّا عايزينهم يصيّفوا في مارينا زي باقي أوباش الشعب من الدهماء .. يا عالم دي العربية المرسيدس الـ E 180 العادية مش الهاي لاين بقت بمليون وستميت ألف .. إيه؟ .. ح يحطوا ميت ألف من معاهم بقى ولّا إيه؟ .. ولّا عايزينهم يحطوا رجليهم الذهبيّة اللي تتلف في حرير في التويوتا والهيونداي بتوع أفراد الشعب السوقة ولاد الكلب .. ده انا يا مؤمن وقفت امبارح في طابور يهد الحيل علشان اشتري كيلو كافيار أسود روسي من النوع الردئ بستاشر ألف جنيه .. يعني ح تدوا كل لاعب مكافأة تسعين كيلو كافيار بس؟ .. ح تاكلوا مصر يعني؟ .. ح تموّتوها يعني؟ .. إيه الرُخْص ده؟ .. ما هو يا تدوا مكافأة عليها القيمة يا بلاش .. لاعبي مصر مش أقل من لاعبي ألمانيا اللي أخدوا مليون جنيه (50 ألف يورو) مكافأة الحصول على كأس القارات (والظاهر ما بياخدوش مكافأة وصول لكاس العالم لإن ده العادي بتاعهم).
ح يطلع واحد هايف ويقول لي يا كابتن لطيف ده
فيه ناس بتاكل من الزبالة .. وناس تانية بتشتري رجلين الفراخ (لو لحقوها قبل ما
تخلص لإن الطلب عليها كبير جداً) علشان تعمل عليها ملوخية أو بطاطس علشان يبقى
فيهم ريحة الزفر .. وفيه كمان ناس بيبقوا في منتهى السعادة والفرح لمّا يشتروا لهم
كيلو عضم بأربعين جنيه (كان زمان الجزار بيحط مع كيلو اللحمة ماسورتين عضم ببلاش
بدل ما يرميهم) علشان يعملوا عليها فتة رز بالعيش وبتبقى ليلة يا عمدة .. الشخص
الهايف ده ما يستاهلش إني أرد عليه أصلاً .. أنا مش ح اتعب نفسي علشان شوية رعاع
سايبين السيمون فيميه والتشيكن بيكاتا ولحم الطاووس المدخّن ورايحين يشتروا عضم
ورجلين فراخ .. يع .. إيه القرف ده؟ .. ما همَّ لو مش عاجبهم حال مصر قاعدين فيها
ليه؟ .. ما كل واحد فيهم ياخد اليخت بتاعه ويسافر بره في أي مصيبة وآدي دقني أهه ح
يرجع مصر تاني علشان مش ح يلاقي يعمل شوبينج بالأسعار المصرية الواو دي.
المهم : لازم الحكومة تدي لكل لاعب خمسة أو
عشرة مليون جنيه على الأقل .. ولو ما فيش ميزانية تغطي مش مشكلة .. ممكن نفرض
ضريبة جديدة ونسمّيها ضريبة كاس العالم مثلاً .. أو نزوّد أسعار البنزين أو
الكهربا مش مهم .. آه .. عندي فكرة كيوت خالص : إحنا نضيف ضريبة ملاهي على كل
تذكرة مستشفى عام أو نستحدث ضريبة دفن للأموات وما حدش يندفن في تراب مصر الزعفران
إلا لمّا أهله يدفعوا المعلوم وإلا نسيب جتته تنتن وريحتها تطلع .. لازم نعمل أي
حاجة بس لاعيبة المنتخب الغلابة دول ما يباتوش مكسورين الخاطر بعد ما جبروا
بخاطرنا .. وطبعاً ح ابدأ بنفسي وأعلن إني مستعد اتبرع لصندوق "يحيا كاس
العالم" بآخر ما تبقى لي من ملابسي الداخلية وامشي في الشارع زي بقيةالناس .. آه والنِعمة.