أمثال صعيدية عبقرية مهجورة | خلاصة الحكمة والخبرة

 

فبراير 2023 :

بمناسبة اقتراب شهر رمضان وبعده بشهرين عيد الأضحى المبارك (أعاده الله علينا باللحمةِ والفتّةِ والشوربات) إليكم بيان بأسعار كيلو اللحمة منذ بداية القرن الماضي في عهد ملوك وسلاطين وفراعين مصر في العصر الحديث :

- الخديوي عباس حلمى التانى (1914 – 1892م): زاد من 2 بارة (البارة = ربع مليم) إلى 2 سحتوت مرة واحدة (السحتوت = اتنين ونص بارة) .. وبعد أن أعلن الخديوي سنة 1899 عن إصدار الجنيه الورق من البنك الأهلي وتقسيمه إلى 100 قرش أصبح سعر كيلو اللحمة (اللي هوَّ اتنين رطل تقريباً) 40 خردة (العشرين خردة = نص مليم) ثم ارتفع إلى الضعف ليصير بنكلة كاملة (النكلة = اتنين مليم) وأخيراً انتهى هذا العهد بأن لامس كيلو اللحمة حدود الاتنين نكلة .. طب الفقرا ياكلوا إيه؟

- السلطان حسين كامل (1917 - 1914م): تراوح بين 4 و 7 مليم .. الله يخرب بيت الحرب العالمية الأولى اللي خلّت الغلبان ما يدوقش اللحمة إلا مرة في الأسبوع.

- الملك فؤاد الاول (1936 - 1917م): قفز من 7 مليمات إلى 15 مليم .. شوف الافترا.

- الملك فاروق الاول (1952 - 1936م): بدأ بـ 15 مليم مروراً بـ 20 مليم اللي همَّ يعني قرشين (ومن هنا جاءت صيحة الأطفال في زفّة أي دبيحة: من ده بكره بقرشين) ثم وصل فجأة إلى 10 قروش .. منها لله الحرب العالمية التانية اللي خلّت المصري ما ياكلش لحمة إلا في المواسم والأعياد بس.

- الملك أحمد فؤاد التانى (1953 - 1952م): قفز من 10 قروش إلى 22 قرش بعد أحداث ثورة يوليو الميمونة .. أيّام سودا بعيد عنك.

- الرئيس محمد نجيب (1954 - 1953م): يا دوبك زاد من 22 قرش لحوالي 25 قرش .. بالذمّة ده كلام يا عب سلام؟

- الرئيس جمال عبد الناصر (1954 – 1970م): تراوح بين 25 قرش و 50 قرش بعد النكسة وحرب الاستنزاف .. يا راجل ده قرش الحشيش أرخص بس ما ينفعش يتعمل عليه شوربة.

- الرئيس محمد أنور السادات (1981 - 1970م): غلا من 50 لـ 60 قرش فخرجت المظاهرات تهتف: "يا سادات ليه معلش .. كيلو اللحمة بستين قرش" .. وبعد تطبيق سياسة الانفتاح الاقتصادي وصل لـ 100 قرش فنادى الناس أيّام الانتفاضة الشعبية في 1977 قائلين: "سيد بيه يا سيد بيه (يقصدون سيد مرعي رئيس وزراء مصر أيّامها) .. كيلو اللحمة بقى بجنيه" .. وبعد أن أسماها الرئيس "انتفاضة الحرامية" (طبعاً لإن أغلب الشعب المصري وقتها كانوا لصوصاً نباتيين لا يأكلون اللحم عكس الأكابر الشرفاء آكلي لحوم البشر) اضطر سيادته لإصدار قانون يجرّم ذبح إناث المواشي ثم يمنع بيع اللحوم أصلاً لمدة محددة حتى انخفض سعر الكيلو إلى 80 قرشاً .. ريّس دكر افتكر فجأة إن فيه كائن هلامي شفاف ما لوش مسكة (موطنه الأصلي وادي النيل وهو يعتبر من أوائل المخلوقات التي تأخذ على قفاها ثم تبوس إيدها وِش ودقن كما يعيش على الفول أغلب فترات السنة أما في موسم التزاوج فربما يتهوّر ويذبح دكر عدس) اسمه "المواطن المصري محدود الدخل" .. رغم ذلك فقد زاد سعر كيلو اللحم حتى وصل إلى جنيهيْن ونصف .. ولكن الرئيس المؤمن آنذاك لم يسكت وأصدر تسعيرة جبريّة تحدّد السعر الأقصى بـ 230 قرش (شوف الحنيّة .. شوف الإنسانيّة) .. وما إن بدأ الرئيس في ممارسة مهامة كأي رئيس خلقه ربنا حتى توفاه ربنا .. آه وربنا .. شوفت حكمة ربنا .. يا ربناااااااا.

- الرئيس محمد حسنى مبارك (2011 - 1981م): بدأ كيلو اللحمة من 250 قرش وفضل يزيد يزيد يزيد .. بلاد تشيله وبلاد تحطه .. حتى استقر به المقام بعد ثلاثة عقود عند 65 جنيهاً (وليس قرشاً) .. ودي كانت أعلى قفزة في تاريخ الدورات الأوليمبية والدورات العالمية والدورات الأفريقية والدورات العربية والدورات البحر متوسطية والدورات الشهرية أيضاً .. روح يا شيخ إلهي يعمر بيتك.

- المجلس العسكري بقيادة المشير محمد حسين طنطاوي (2011 - 2012م): نظراً للظروف العصيبة التي كانت تمر بها البلاد آنذاك فلم يزد الكيلو إلا خمسة جنيهات فقط ليصبح 70 جنيه .. ولله الأمر من قبل ومن بعد.

- الرئيس محمد محمد مرسى (2013 - 2012م): ما لحقش يريّح ع الكرسي غير سنة واحدة بس يا كبد امه .. لكن سره كان باتع فزاد الكيلو عشرة جنيهات ليصبح 80 جنيه مع الرأفة .. بلاها لحمة .. تاخد سوسو؟

- الرئيس .. آآآ .. الرئيس اسمه إيه ده .. اللهمَّ صلّي ع النبي .. آآآآآ .. آه .. الرئيس محمد عدلي منصور .. إيه؟ ما كانش اسمه محمد .. إزاي الكلام ده؟ .. احنا زي ما أي سوّاق عندنا يبقى اسمه "عبده" كمان أي رئيس عندنا لازم يبقى اسمه محمد زي اللي سبقوه .. خلاص خلاص .. ما علينا .. الرئيس عدلي منصور (2014 - 2013م): الراجل ده الله يبارك له كان أمير .. ما تسمعش صوته .. علشان كده كيلو اللحمة ما خدش خبر إن حاكم مصر اتغيّر ففضل على حاله بـ 80 جنيه .. وكان يوم ما يتمعظم قوي يبقى بـ 82 جنيه .. شوفت الهنا اللي احنا فيه؟

- الرئيس عبد الفتاح السيسي (2014م .. وطالع .. ما تعدش بقى .. ربنا يدي له الصحة وطولة العمر وياخدنا احنا يا شيخ): توحّش سعر كيلو اللحمة البلدي أكثر فأكثر وأطاح بكل من وقف في طريقه ليصل في ثلاث سنوات فقط وحتى كتابة هذه السطور إلى 200 جنيه (وفي بعض الأماكن 230) ...... أقول إيه والنبي؟ .. يا رب .. آآآ .. آآآآآآآ .. يا رب ....... يا رب انت عارف بقى.

حاشية:

أكتب هذه الحاشية ف يناير 2024 لأستكمل بها المقال أعلاها لأُسجّل سعر كيلو اللحم الآن بعد أقل من سنة على كتابة هذا المقال حيث وصل إلى 400 جنيه تقريباً (تبدأ من 350 في الأماكن الشعبية حتى 450 في الأماكن الراقية) .. ولله الأمر من قبل ومن بعد.