ناس وناس
فيه ناس ماتت عشان تعبر
وترفع يا بلد إسمِك
وناس عاشت عشان تهبر
وتنهش حِتّة من جسمِك
فيه ناس حاربت عشان عرضك
رَوِت من دمها أرضك
وأدِّت يا وطن فرضك
بدون لحظة ما تتردد
فيه ناس ماتت عشان مبدأ
سنين بسلاحها ف الخندق
ومين ممكن يكون أصدق
من اللي عشانك استشهد
فيه ناس ماتت بلا زفة
وسابت مصرنا واقفة
ولو يتحط ف الكفة
بطل منها بجيش كامل
لا تعرف يعني إيه تطبيع
ولا معنى إنك انت تبيع
تاريخ أُمة خلاص بيضيع
بوهم اسمه سلام شامل
فيه ناس قضّت على الجبهة
سنين مكويّة بلهبها
تاريخنا عمره ما جابها
ولا سجّل حكاياتها
لا سألِت عن مكاسبها
ولا العيلة اللي ح تسيبها
ولا كانت بتحسبها
وضحّت راضية بحياتها
فيه ناس حاربت ومش عايزة
ولا تكريم ولا جايزة
وقابلت ربّها فايزة
بجناته ورضوانه
وناس عاشت عشان تحرق
وطن وف ثروته تسرق
وجاهزة تهج لو يغرق
فلا عاشوا ولا كانوا
فيه ناس لاجل البلد صنعت
ملامح نصر بيه رفعت
رقابنا فوق وما طمعت
ف مال يا مصر أو شهرة
فيه ناس لاجل البلد قاست
وفوق المستحيل داست
وناس من بعدها عاثت
فساد في أرضك الطاهرة
من الشُهدا ف عبور الجيش
إلى الشُهدا ف طابور العيش
سنين فاتت وما قدرتيش
تصوني نصرِك الغالي
فيه ناس سرقت ثمار النصر
وباعت كل حاجة في مصر
وخليتنا نعيش ف عصر
ما هيش بلدي وانا مالي
وانا مالي
وانا مالي
وانا مالي