أمثال صعيدية عبقرية مهجورة | خلاصة الحكمة والخبرة

قصيدة جحا 

 

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

 

إنك تبيع قلبك وجسمك

وانك تبيع قلمك وإسمك

ما يجيبوش حق الرغيف

 

سألوا "جُحا" عن سِر ضِحكُه

قال لك أصل اتنين وشبكوا

اللي كان من تحت ميّت

واللي كان من فوق كفيف

ده شعور سخيف

 

وشعور سخيف

إنك تكون رمز الشحاتة

تبني مبنى للشحاتة

تعمل وزراة للشحاتة

 

يا ساقية دوري عدّي فوقي ودوسي

نصبوا عليَّ وشحّتوني فلوسي

ربطوني فيكي .. حتى ما اتغمّيت

همَّ اللى فِرحوا ووحدي انا اتغمّيت

 

أنا اللي صاحب البيت

عايش بدون لازمة

ولمّا مرّة شكيت

إدوني بالجزمة

 

مش لاقي تطفح اديك

هاتوا لنا وجيبوا لنا وادّونا ودّونا

ح نجيب منين ندّيك

طافِح يا بلدي غدايَ ولوْعتي غدايَ

وادي الأحِبّة التفّوا واتجمّعوا عدايَ

 

أنا اللي زارعِك دَهَب

بتأكّليني سباخ

إن كان ده تُقل ودَلَع

بزيادة دَلَعِك باخ

 

لا شوفت فيكي هَنا

ولا شوفت فيكي تَرَف

كل اللي فيكي قَرَف

 

كرامِتنا مِتهانة

واللُقمة بإهانة

بتخلّفينا ليه

لمّا انتي كارهانا

 

يعني إيه تبقي انتي هِبة النيل يا بوبة

وكل يوم الميّة تقطع

يعني إيه لمَا اشتكي غِلوْ الفاتورة

يقولوا تِشكي .. بس تِدفع

 

لما قَش الرُز ثروة بتتحرِق

وامّا نَفط الأُمّة ثروة بتتسرِق

وامّا جلّادِك على ولادِك بيبطش

وامّا عِلْمِك ما يلاقيش ياكل فيطفش

 

يعني إيه نرفع إيدينا بالسلام لاجل الغزاة

ويعني إيه لمّا ابقى ماشي ف حالي اتشد اشتباه

يعني إيه لمّا اتحبس أربع سنين حبس احتياطي

حبس اعتباطي

 

يعني إيه مش حاسّة بالعُمر وغلاوته

بتصُبّي مُر العُمْر ليه

ده انا كنت ح اوْهب لِك حلاوته

 

أنا عمري ما اتأمّرت ولا حطّيت شروطي

ومكان ما ترسى مركبِك بابني شطوطي

أنا كنت جيشِك لما مماليكِك باعوكي

وكنت "يوسِف" لما عِشتى سنين عِجاف

وضلوعي دي اللي ف معركة قادِش حَموكي

وشفايفي دي اللي ما بطّلتش ف يوم هتاف

 

ده انا كُل شِبْر ف أرضك اتمرمغت فيه

وكُل يوم عِشتيه أنا اتعذّبت بيه

بتكرّهيني عيونِك السودا وأيّامي اللي فاتت

ما انتيش حبيبتي من النهار ده .. حبيبتي ماتت 

 

على صوت أدانِك جَرس .. ف الشدّة صاحيين لِك

من امتى كانوا الحَرس همَّ اللى باقيين لِك

بِعتيني علشانهم وعنيكي معصوبة

يا هل ترى خاينة ولّا زيّي مغصوبة

 

كل الكلام اتقال والشِعر بقى ماسِخ

و الصبر عِلو جبال والظلم شيء راسِخ

وطن وغرقان ف النطاعة

كل شيء ريحته نطاعة

علّمونا بالعصاية

ورضّعونا الخوف رضاعة

 

علّمونا ف المدارس يعني إيه كِلمة قيام

علّمونا نخاف من الناظر فيتمنِع الكلام

علّمونا ازاي نخاف وازاي نكِش

بس نسيوا يعلّمونا الاحترام

فما تزعلوش لمّا ابقى مش باسمع كلامكم

وماتزعلوش لمّا ابقى خارج ع النظام

 

مستني إيه من طِفل ربّوه بالزعاق غير المشاكل والخناق

كل اللي بيقول لِك باحبِك دول نفاق

أنا لمّا قلت لِك باحبِك كان نفاق

 

الحب يعني اتنين بيدّوا

مش إيد بتبني وسُتميت تيت تيت يهدّوا

الحب حالة

الحب مش شِعر وقِوالة

 

الحب يعني براح ف قلب العاشقين للمعشوقين

يعني الغلابة يناموا ف الليل دفيانين

الحب يعني جواب لكل المسجونين

همَّ ليه بقوا مسجونين

 

يعني اعيش عشان هدف عشان رسالة

يعني احس بقيمتي فيكي انى مش عايش عوالة

يعني لمّا اعرق تكافئيني بعدالة

 

الحب حالة 

الحب مش شِعر وقِوالة

الحب حاجة ما تتوجِدش ف وِسْط ناس

بتجيب غداها من صناديق الزبالة

الحب جوّاكي استحالة

 

بَارَت مَرَاعِينا والبِئرُ قَد جَفَّ

وَالْجُوعُ يِكْوِينَا وَالْصَّبْرُ مَا كَفَّى

وَالْقَلْبُ لَا يَهْدَا وَالْجُرْحُ لَا يُشْفَى

وَلِأَنَّنَا طَوْعٌ زِنِّا لَهُم خفَّ

جَاءُوَا بِمَوْكَبِهِم.. واشتغلِت الزفَّة

 

الدفَّة مظبوطة واصلاً ما فيش دفَّة

والكفَّة مِش مايلة علشان ما فيش كفَّة

و"جُحا" اللي جاي باللّيل لسّاه بيتخفَّى

 

شايف ديدان الغيط سارحة وما راحماشي

من جُبْنُه شاف الدود سابه وراح ماشي

ولا اتكسف م الناس ولا حس على طولُه

الناس عَشَمها كبير جريوا بيشكوا له

ضحك "جُحا" ضِحكة مواشي

مادام بعيد عن طيني ... ماشي

 

الدود قاعد لك يا "جُحا" ولابد فى طينك

بعد ما يمُص ف دِمانا مِش ح يحلى له الّا طينك

إحنا أهلك .. إحنا رجّالتك عمادك

إحنا وقت الشدّة سندك .. إحنا زادك

يا "جُحا" احمي ولادك 

لو كنت عايز تحمي طينك

 

سوف أرحلُ ربما يلقانى مَن أرجو لِقاه

ح امشي ويّا الشحّاتين وابكي على حِلمي اللي تاه

بس مش ح اشحت رغيف

ح اشحت وَطن لله

 

 

هشام الجخ